Атырдьах ыйын 19 күнүгэр Мээндиги нэһилиэгин спортивнай олоҕор кэрэ бэлиэ түгэн буолла. Олохтоох көҕүлээһиннэри өйүүр бырагыраамаҕа кыттыы түмүгүнэн, волейболлуур саҥа былаһаакка арыллан, бу күн тирии мээчик өрө көттө. Нэһилиэк бэтэрээн уонна үүнэн ыччат дьоно волейболга күрэхтэстилэр.
Былаһаакканы эдэр урбаанньыт Василий Семенов салайааччылаах биригээдэ уонна Мээндиги ыччаттарын көҕүлээн Михаил Охлопков, Михаил Куприянов, Прокопий Иванов тутан, оҥорон үлэҕэ киллэрдилэр. Саҥа спортивнай эбийиэккэ Мээндиги волейболист көлүөнэлэрин аата иҥэрилиннэ. Бу үөрүүлээх күн күндү ыалдьыттарынан СахВа маастара, Мээндиги-1 хамаанда капитана Семен Габышев, дьахталларга Мяндиги-1 хамаанда капитана Евдокия Денисова, чилиэннэрэ Анастасия, Анатолий Собакиннар, Марфа Соломонова, Лидия, Николай Гаврильевтар буоллулар. Кэлбит ыалдьыттары СӨ физическэй култуураҕа уонна спортка үтүөлээх үлэһитэ Михаил Алексеев, нэһилиэк баһылыга Илья Семенов, нэһилиэккэ волейбол сайдыытыгар кылаатын киллэрбит Семен Габышев эҕэрдэлээтилэр. Аалай лиэнтэтин тутааччы Михаил Охлопков, спорт исписэлииһэ Андрей Данилов, спорт бэтэрээнэ Михаил Алексеев дохсун ытыс тыаһын ортотугар быстылар. Бу күн үс көлүөнэ волейболистара волейболга күрэхтэрэ бэрт сэргэхтик ааста. Күрэхтэһии кылаабынай судьуйатынан спорт бэтэрээннэрэ Семен Габышев, комментаторынан Гаврил Филиппов үлэлээтилэр.
Тыҥааһыннаах оонньуулар түмүктэринэн бастакы миэстэни Андрей Данилов капитаннаах Мяндиги-3 эдэр ыччат хамаанда ылан кыайыы өрөгөйүн биллилэр. Иккис миэстэҕэ Александр Ноговицын капитаннаах «Мяндиги-1» бэтэрээннэр хамаандалара уонна үһүс бочуоттаах миэстэҕэ Данил Лонгинов капитаннаах «Мяндиги-2» хамаандата таҕыстылар. Волейболистар Мээндигигэ үлэлээбит сылларын ахтан-санаан, уруккуну-хойуккуну кэпсэтиһэн, эдэр саастарын эргитэн күрэхтэһэн, сүргэлэрэ көтөҕүллэн, махтал тылларын этэн үөрэн-көтөн тарҕастылар.
Саҥа волейболлуур былаһаакка кэлэр көлүөнэ ыччаттарбытын спорт кэрэ эйгэтигэр, чөл олоххо тардыһалларыгар олук буолуоҕа. Бу былаһааккабыт волейбол аҥардас Мээндиги эрэ нэһилиэгэр буолбакка, улууска эмиэ сайдарыгар төһүү күүс буолуо диэн эрэнэбит.
Альбина ФИЛИППОВА