«Хардыы» — Амма нэһилиэгин саамай улахан иэннээх, общественнай олоххо көхтөөх нэһилиэнньэлээх түөлбэтэ буолар. Нэһилиэккэ түөлбэ үлэтин биир бастакынан көҕүлээбит, араас таһымнаах бырайыактарга, Граннарга кыттан оҕо оонньуур, спортивнай аныгыллыы балаһааккалары олоххо киллэрбит түөлбэ күннэтэ саҥаттан саҥа сүүрээннэри сүрүннүүр. Күн бэҕэһээ олохтоохтор уонна оҕолор «Сад памяти» Аан дойдутааҕы акцияҕа кыттыһан 80 акацияны спортивнай балаһааккаҕа олортулар.
Акациялары Амматааҕы эдэр натуралистар станцияларын үлэһиттэрэ икки сыл устата көрөн-харайан, улаатыннаран биһиэхэ олордорбутугар көмөлөһөн биэрдилэр. Станция производственнай үлэҕэ маастара Александра Киренская ыйыытынан, сүбэтинэн оҕолуун, улахан дьоннуун бары тэҥинэн үлэлээн акацияларбытын олортубут. Акацияларбытыгар нэдиэлэ аайы бары ыалынан күргүөмүнэн тахсан уу кутуохпут. Бэс ыйыттан капельнай полив систематын Андрей Васильевич түөлбэ эр дьонун кытта сүбэлэһэн, тардыы үлэтин саҕалыахтара. Капельнай полив тардылыннаҕына мастарбыт сайын устата улаатан, көҕөрөн — чэлгийэ үүнүөхтэрэ. Онуоха хас биирдиибит тус кыһамньытын, санаатын ууран туран уопсай дьыалаҕа кыттыһан, көмөлөһөн, мастарбыт улааталларыгар тус кылааттарын киллэриэхтэрэ диэн эрэнэбит. Түөлбэбит олохтоохторун аатыттан Амматааҕы эдэр натуралистар станцияларын коллективыгар улахан махталбытын биллэрэбит. Аммабыт нэһилиэгин өрүү күөх үүнээйинэн, кэрэ сибэккилэринэн киэргэтэр үлэһит дьоммут үлэтэ өрө тахсыылаах, таһаарыылаах буоллун.
Александра Егорова, «Хардыы» түөлбэ олохтооҕо.