В.Г. Короленко аатынан Амма 1 нүөмэрдээх орто оскуолатыгар 7-8 кылаас үөрэнээччилэригэр улууска бастакытын «Книжный олимп» литературнай марафон буолан ааста. Бырайыак ааптарынан Бөтүҥ орто оскуолатын педагог-библиотекара, О.И.Сидоркевич аатынан оҕо сайдар киинин эбии үөрэхтээһинин педагога Борисова Василина Васильевна буолар.
Бырайыакка Амма 1 нүөмэрдээх орто оскуола педагог-библиотекара Гаврильева Оксана Семеновна көмөлөстө уонна улуустааҕы үөрэх салалтатын кытта анал бириистэри туруорда.
Марафоҥҥа барыта 8 хамаанда кытынна. Оонньуу 9 станциянан олус сэргэхтик ааста. Айар тыл эйгэтинэн умсаахтаан араас хабааннаах литература ыйытыктарыгар, сорудахтарыгар, оонньууларыгар киирэн таҕыстылар.
Дьүүллүүр сүбэҕэ Күннүк Уурастыырап аатынан кииннэммит библиотекатыттан сүрүннүүр специалист Винокурова Лариса Егоровна, улуустааҕы үөрэх салалтатыттан методическай салаа сүрүн специалиһа Рязанская Наталия Константиновна, Чакыртан педагог-библиотекарь Новикова Светлана Николаевна, Амма 2-с нүөмэрдээх орто оскуолатыттан педагог-библиотекарь Алексеева Елена Васильевна үлэлээтилэр.
Түмүккэ «Бастыҥ хапытаан аатын» Чакыр орто оскуолатыттан Айуол Новиков ылла уонна хамаандатынан 1 миэстэни ылары ситиһэн, анал Дипломунан, кубогынан наҕараадаланнылар. 2-кэ Бөтүҥ орто оскуолатын хамаандата, 3-кэ сатаҕайдар уонна Амма 2-с нүөмэрдээх орто оскуола оҕолоро таҕыстылар. Маны таһынан, бары кыттыбыт хамаандалар анал ааттарынан уонна өйдөбүнньүк бириистэринэн бэлиэтэннилэр.
Кэнэҕэскитин да бу бырайыак элбэх оскуоланы, кэлэр кэнчээри ыччаты түмэн, ааҕыы эйгэтигэ интэриэһи үөскэтиэ дии саныыбыт.