Быйыл аан бастакытын Дьокуускай куоракка өрөспүүбүлүкэ бибилэтиэкэрдэрин сийиэстэрэ тэрилиннэ. Манна араас улуустартан, куораттартан дэлэгээттэр кэлэннэр икки күн устата сиэксийэлэринэн үлэлээтилэр, аһаҕас кэпсэтиигэ кытыннылар. Амма улууһуттан 9 дэлэгээт ортотугар Амма Наахара орто оскуолатын педагог- бибилэтиэкэрэ Надежда Григорьева баар.
“Бу бибилэтиэкэрдэр I сийиэстэрэ олус туҺалаах уонна наадалаах буолла. Манна дэлэгээт буолан кыттыыны ылбытым миэхэ инники үлэбэр элбэҕи биэрдэ. Амма улууҺун оскуолаларын педагог-библиотекардарын ааттарыттан сырыттым. Сийиэс элбэх киҺини түмтэ. Сиэксийэлэри таһынан муниципальнай бибилэтиэкэлэр сайдыыларыгар туһуламмыт “төгүрүк остуол” ыытылынна. Мин манна сылдьан ордук «Айар» национальнай кинигэ кыһатын дириэктэрэ Егоров Август Васильевич эппит тылын биҺирээтим. Тоҕо диэтэр кини бэйэтин этиитигэр оскуола бибилэтиэкэрдэрин кыҺалҕатын таарыйда. Ол курдук билэрбит курдук оскуолаҕа учебник эрэ ылыытыгар харчы көрүллэр. Онон бибилэтиэкэбитигэр уус уран литератураны ылар кыахпыт суох. Аны сурутууга эмиэ үбүлээһин көрүллүбэт. Оскуола бибилэтиэкэлэригэр үчүгэй уус уран литература кэлэрэ буоллар, оҕолорбут кинигэ ааҕыылара үрдүө этэ дии саныыбын. Бу кыһалҕаны биһиги куруутун туруорсабыт. “Төгүрүк остуол” түмүгүнэн бу оскуола бибилэтиэкэлэрин кыҺалҕатын түмүк ылыллыбыт резолюциятыгар киллэрэргэ этии киллэрбитим. Маны сэргэ төрөөбүт тылынан ааҕыыны киэҥник киллэрии туһунан кэпсэтэр сиэксийэҕэ сылдьыбытым. Бу мин үлэбинэн чугас тиэмэ. Сиэксийэ модераторынан Былатыан Ойуунускай аатынан литературнай түмэл дириэктэрэ Рустам Каженкин үлэлээтэ. Бэрт интэриэһинэй, үчүгэй кэпсэтии тахсан, бэркэ сэргээн иһиттим. Онон олус туһалаах сийиэскэ сылдьан элбэҕи билэн, кэллиэгэлэри көрсөн, уопут атастаһан кэллим”, — диэн сийиэс дэлэгээтэ Надежда Григорьева санаатын үллэһиннэ.
“Амма олоҕо” хаһыат