Амма улууһун көхтөөх бэтэрээннэрэ, волонтердара Өлүөнэ очуостарыгар сынньаннылар. Бары биир санаалаахтар мустаннар икки күнү үөрэ-көтө атаардылар, очуостары көрөн сөхтүлэр.
Улуус көхтөөх бэтэрээннэрэ уонна «Амарах сүрэх» уопсастыбаннай түмсүү волонтердара, барыта 22 буолан дойдубут киэн туттуутугар Өлүөнэ очуостарыгар сылдьан астына сынньанан кэллибит, айаммыт күннэрин туһалаахтык атаардыбыт. Ол курдук сарсыардаттан араас эти-хааны чэбдигирдэр сэрээккэлэри оҥорон, Ытык сиртэн алгыс ылан, сиэри-туому толорон барыбытын түмэр оһуохайга кыттыстыбыт. Хаартыскаҕа эрэ көрөр Өлүөнэ эбэбит очуостарыгар, 2600 м үрдүккэ дабайан баҕа санаабытын толордубут.
Бары биир санаалаах дьон дуоһуйа кэпсэтэн, үгүһү билэн-көрөн, күҥҥэ үстэ астына аһаан, сылаас каюталарга сынньанан, киэһэтин үҥкүүлээн, күрэхтэргэ кыттан, хаартыскаҕа түһэн, олус сэргэхсийэн кэллибит. Сахабыт да сиригэр омук дойдутун курдук аһатар, түһэрэр буолбуттарын көрөн хайҕаатыбыт. Маннык үөрүүнү бэлэхтээбит улууспут баһылыгар Степан Николаевич Кузьмиҥҥа, бэтэрээннэр Сэбиэттэрин бэрэссэдээтэлэ Мария Романовна Захароваҕа улахан махталбытын биллэрэбит. Элбэх кэпсээн кэһиилээх, инники былааннардаах дьиэбитигэр, тапталлаах Аммабытыгар тарҕастыбыт.
Наталья КОНСТАНТИНОВА, Эмистээҕи үһүс көлүөнэ салайааччыта