2-Чакыр нэһилиэгин олохтооҕо, сэрии сылын оҕото, үлэ бэтэрээнэ Васильева Любовь Дмитриевна 90 сааһын сүһүөҕүн үрдүгэр, чугас дьонун ортотугар үөрэ-көтө көрсөр. Ытык киһини үбүлүөйдээх сааһынан улуус, нэһилиэгин салалтата эҕэрдэлээтэ.
Любовь Дмитриевна Васильева 1936 сыллаахха от ыйын 20 күнүгэр Амма улууһун Болугур нэһилиэгэр күн сирин көрбүтэ. Эдэр сааһыттан холкуос, сопхуос араас үлэтигэр, 1972 сылтан бочуоттаах сынньалаҥҥа тахсыар диэри Чакырдааҕы “Ньургуһун” уһуйааҥҥа ньээҥкэнэн үтүө суобастаахтык нэһилиэк кэнчээри ыччатын ииппитэ.
Күн бүгүн Любовь Дмитриевна 8 оҕо тапталлаах ийэтэ, элбэх сиэн, хос сиэн эбэтэ буолан дьоллоох олоҕу олорор.
Олоххо олус көхтөөх киһибит, «Үлэ бэтэрээнэ», «Чакыр нэһилиэгин бочуоттаах олохтооҕо», «Саха Өрөспүүблүкэтин Ытык сүбэтин ытык киһитэ», “Амма улууһун култууратын уонна духуобунаһын сайдыытын иһин” бэлиэлэр хаһаайкалара буолар. Улуус иһинэн ыытыллар ырыа күрэхтэрин хас да төгүллээх кыайыылааҕа.
Ытык киһибитин үбүлүөйдээх күнүгэр улуус баһылыгын социальнай боппуруостарга солбуйааччыта Николай Ларионов, нэһилиэнньэҕэ социальнай көмөнү оҥорор биир кэлим киин дириэктэрэ Сахаяна Неустроева уонна Чакыр нэһилиэгин баһылыга, сиэнэ Семен Григорьев истиҥ эҕэрдэлэрин тириэртилэр, сэмэй бэлэхтэрин туттардылар. Любовь Дмитриевна нэһилиэккэ бэйэтин кэмигэр үлэлээн-хамсаан, дьон ортотугар дириҥ убаастабылы ылбыта. Билигин да үтүө сүбэтинэн чугас дьонугар күүс-көмө буолар. Убаастыыр киһибитин, нэһилиэкпит ытык олохтооҕун өссө төгүл 90 сааскынан истиҥник эҕэрдэлиибит уонна чэгиэн буолууну, бу курдук сүбэҕинэн-амаҕынан, тапталгынан чугас дьоҥҥун угуттуу олор диэн алгыспытын аныыбыт.
Дария ЛУКИНА