Амма нэһилиэгин Дьабы бааһынатыгар урбаанньыт Руслан Федотов элбэх сыллаах оту ыспыта быйыл үһүс сылыгар барда. Быйыл от саамай үүнэр кэмигэр курааннаан үгүс ходуһа үчүгэй үүнүүнү биэрбэтэ. Маныаха бэйэ бэйэҕэ көмө буолуу улахан төһүү буолар.
“Быйыл сайын курааннаан “Кэскил” ХЭТ ходуһалара аанньа үүммэтилэр. Бу туһунан тэрилтэ салайааччыта Александр Алексеевич Карманов билиһиннэрэн, улуус тыатын хаһаайыстыбатын салайааччыта Ион Семенович Кононовы кытта сүбэлэһэн баран, бэйэбит өр сыллаах от бааһыналарбытын тэрилтэ оттууругар биэрдибит. Төһө да курааннаатар, от үүнүүтэ орто. Өр сыллаах от 3-4 сылыгар үүнүүнү биэрэр. Миэстэтигэр рулоннаан, дьаарыстаан кэбиһиэхтэрэ.
Аны кыһын Дьабы бааһынатыттан Муксун ферматыгар диэри илдьиэхтэрэ. Икки арда кыра, онон ороскуота да кыра буолуо. Хаһаайыстыба сүөһүтэ элбэх. Онон быйыл ходуһалара аанньа үүммэккэ уустуктар үөскээбиттэрин өйдөөн, бу курдук быһаарынныбыт. Ханнык да кэмҥэ бэйэ бэйэни өйөһө сырыттахпытына эрэ, кыайыылаах буолуо, уустук кэмнэри аһарыахпыт.
Биһиги бэйэбит хаһаайыстыбабыт сүөһүтэ, сылгыта сыл тахсарыгар кыстык отугар Лээгигэ 3 звено оттуу сылдьар. Ол курдук Хомустаах хочотугар (Өнтө хайата), Төгүлтэ үрэҕи өрө Харбалаахха диэри уонна Буордаах, Уккаан үрэхтэргэ оттуу сылдьаллар. Өрүс уута кэлэн билигин көһөллөрүгэр мэһэйдэри көрсүбүттэрэ. Ол гынан барыта этэҥҥэ буолан, билигин кураан күнү-дьылы былдьаһа оттууллар, кыстыыр оппутун булунуохпут диэн эрэллээхпит”, — диэн Руслан Еремеевич сырдатта.
Бу курдук уустук кэмнэргэ бэйэ бэйэни өйөһөн, быыс -хайаҕас булан сүөһүбүтүн-сылгыбытын этэҥҥэ сыл таһаарар туһугар биир сүбэнэн үлэлиирбит көдьүүһэ улахан буолар. Хаһаайыстыба күн бүгүн тигинэччи оттуу сылдьар, биир дойдулаахтарыгар, убай киһилэригэр өйөбүлүн иһин махталларын этэллэр.
“Амма олоҕо” хаһыат