Күн-дьыл туран биэрдэр, салгыы уһун ардахтар түспэтэллэр от үлэтэ кэмигэр үмүрүйүө этэ. Улуустааҕы тыа хаһаайыстыбатын управлениета сэттиэлэҕэ икки күн субуокканы хомуйар. Аан күҥҥэ ылыллыбыт субуокканан улуус үрдүнэн 13412 туонна от оттонно, былаан 43,26 бырыһыаҥҥа тэҥнэстэ.
“Бу күннэргэ кураан күннэр тураннар отчуттар балайда күүскэ оттоотулар. Күн бүгүн улуус үрдүнэн оттооһун күүскэ бара турар, тахсыахтаах дьон бары тахсан, кэтэх хаһаайыстыбалар үгүстэрэ от үлэтин түмүктээтилэр диэххэ сөп. Билигин бу бастакы Ыспааһап ардаҕа уһаабакка, күн-дьыл туран биэрдэҕинэ отчуттар отторун атырдьах ыйа бүтүөр диэри сүрүннээн үмүрүтүөхтэрэ. Атырдьах ыйын 10 күнүн туругунан 13412 туонна от бэлэмнэннэ. Мантан 911 туонната көһө сылдьан оттуур биригээдэлэринэн бэлэмнэннэ. Уопсайа улуус үрдүнэн окко 1700-тэн тахса киһи, 937 техника үлэлиир”, — диэн этэр улуус кылаабынай агронома Николай Гаврильев.
Тэрээһиннэх хаһаайыстыбалар былааннарын 24,1 бырыһыан, бааһынай хаһаайыстыбалар 46,3 бырыһыан, кэтэх сүөһүлээхтэр 53,1 бырыһыан толордулар. Санатан эттэххэ, бу сезоҥҥа тэрээһиннээх хаһаайыстыба 7754 туонна, бааһынайдар 11803 туонна уонна чааһынайдар 11443 туонна оту оттуохтаахтар. Ааспыт сыл бу кэмин кытта тэҥнээтэххэ, от былаана 71, 1 бырыһыан туолбута, 17588 туонна от бэлэмнэниллибитэ. Эбии аһылыгы бэлэмниир хаһаайыстыбалар кыралаан сиилэс быһыытыгар киирбиттэрэ. Ол курдук “Абаҕа” ХЭТ атырдьах ыйын 11 күнүнэн сиилэһин быстаран түмүктээтэ, 1000 туоннаны уган, былаанын 100 бырыһыан толордо. Маны сэргэ Константин Фомин бааһынай хаһаайыстыбата сенаж бэлэмнээһинигэр киирдэ.
Билигин отчуттарга күн-дьыл туран эрэ биэриэн наада. Кылаабынай агроном бэлиэтээбитинэн, уһун ардахтар кэлбэккэ, отчуттарга табыгастаах күннэр туралларыгар баҕарабыт.
“Амма олоҕо” хаһыат