Үбүлүөйдээх Дыгын Оонньууларын муҥутуур кыайыылааҕа Борис Сдвижков Манчаары оонньууларын иннинэ дойдутугар тахса сырытта. Бу түгэни нэһилиэгэ мүччү туппакка, боотурдарын өрө күүрүүлээхтик көрсөн үөртүлэр, долгуттулар.
«Биһиги биир дойдулаахпыт, харахпыт ортотугар улааппыт ыччаппыт Борис Сдвижков быйыл Туймаада ыһыаҕар «Дыгын оонньууларыгар» муҥутуур кыайыылаах аатын сүгэн барыбытын олус диэн үөрпүтэ, киэн туттууну үөскэппитэ. Икки күн устата бары быһа эпиири көтүппэккэ көрбүппүт, онтон бэйэм миэстэтигэр олорон Борис киирсиитин көрбүтүм. Сарсын Манчаары оонньуулара аһыллаллар. Бу саха дьоно, спортсменнар эмиэ олус күүтэр спартакиадалара буолар. Борис манна эмиэ многоборьеҕа улууһун чиэһин көмүскүөхтээх. Онон киниэхэ бу улахан спортивнай күрэххэ ситиһиилэри, кыайыыны баҕаран, алгыс тылбытын тириэрдээри, кини Дьокуускайтан дойдутугар кэлээтин кытта көрүстүбүт. Көрсүһүүгэ Борис саамай чугас дьоно, төрөппүттэрэ Эльза Васильевна, Сергей Сергеевич, быраата Гарик кыттыыны ыллылар. Манна даҕатан эттэххэ Гарик Нерюнгри куоратыгар Олоҥхо ыһыаҕар эр бэртэр күрэхтэригэр сүүрбэттэн тахса спортсмен кыттыбытыттан бэһис миэстэни ылан эмиэ барыбытын үөртэ. Уолбутун олохтоохтор, ону сэргэ Амматтан кэлэн кытта көрүстүлэр. Бары эҕэрдэлээн алгыс тылбытын анаатыбыт. Ситиигэ салама ыйаан Бориска туттардыбыт. Бу ситиигэ ыйаммыт саламалар — бу көрсүһүүгэ кэлбит дьон алгыс тыллара. Борис бэйэтэ айылҕаҕа, итэҕэлгэ олус чугас. Онон киниэхэ дойдутун сылаас тыына күүстэ-уохта биэрдин», — диэн этэр Чапчылҕан нэһилиэгин баһылыга Дьулустан Юшков.
Борис Дьокуускай куораттан мэр Евгений Григорьев туруорбут кылбаа маҥан УАЗ патриотугар айаннаан кэлээт Кыыс Аммаҕа монуменыгар ааһан, доҕотторун, биир дойдулаахтарын кытта автопробег оҥорон Чапчылҕаҥҥа тиийэ, нэһилиэгин уонна улууһун былааҕын күөрэччи анньан кэллэ. Кинини спортивнай саала иннигэр дуорааннаахтык, сылаастык көрүстүлэр. Борис массыынатыттан түһээт барыларын кытта куустуһан, илии тутуһан наһаа сылаастык көрсүстэ.
Кинилэр ортолоругар төрөппүттэрин сэргэ, оскуолаҕа физкультураҕа уһуйбут, ону сэргэ кылааһын салайааччыта Наталья Романовна Алексеева, үөрэппит учууталлара, тэбис тэҥҥэ киирсибит биир дойдулааҕа, билигин Сунтаар улууһугар олорор, Абаҕаттан төрүттээх Тимофей Большаков, чугас ыаллара, бииргэ үөрэммит оҕолоро уонна кини кыайыытынан киэн туттар «ыалдьааччылар» бааллар. Кырачаан уолаттар кумирдара тиийэн кэлбитигэр олус диэн долгуйан, бүтүннүү харах, кулгаах буолан көрүстүлэр.
«Борис кыра эрдэҕиттэн спордунан дьарыктанан барбыта. Олус дьаныһан туран эрчиллэр этэ. Тустууттан саҕалаабыта. Биһиги дьиэ кэргэҥҥэ бары спорду сэҥээрэбит. Улахан күрэхтэһиилэри көтүппэккэ көрөөччүбүт. Онон да оҕолорбут иккиэн спордунан утумнаахтык дьарыктанар буоллахтара. Хайаан да спортсмен буолуохтааххын диэн ииппэтэхпит. Боруоста кинилэри өйүүбүт. Биллэн туран уолбутунан киэн туттабыт. Кыайыыта судургутук кэлбэтэ. Утумнаах, күүстээх дьарык түмүгэ», — диэн Борис ийэлээх аҕата санааларын үллэстэллэр.
Чахчы да төрөппүт өйөбүлэ, кинилэр эрэллэрэ спортсмеҥҥа улахан күүһү биэрэр. Борис кыра эрдэҕиттэн ылыммыт дьыалаларын хайаан да тиһэҕэр тириэрдэрэ, ылсыбытын ыһыктыбата кинини бу муҥутуур кыайыыга тириэртэҕэ. Былырыын да Дыгын оонньууларыгар кини кыл мүччү үрүҥ көмүс призер буолбута. Онон быйыл хайаатар да инники күөҥҥэ тахсарга Борис күүскэ дьарыктаммыта, оннук сыаллаах Дыгын оонньууларыгар күүстээх сүүмэрдээһини ааһан киирбитэ.
«Дыгын оонньууларыгар мин төрдүс төгүлүн кыттыыны ыллым. Этэҥҥэ, туох да эчэйиитэ суох ааста диэн үөрэбин. Тренердэрим үчүгэй турукка киллэрэн, кииристим. Дойдубар, улааппыт сирбэр кэлэн буолбут көрсүһүүттэн наһаа долгуйдум, үөрдүм уонна махталбын тириэрдэбин. Мин сайын аайы дойдубар уоппускабар кэлэн сайылыыбын. Дыгын оонньуулара буолуон биир ый иннинэ дойдубар кэлэ сылдьыбытым. Бултаан-алтаан, дьарыктанан күүс бөҕө ылбытым, ол күүс баар буолан Үс Хатыҥ түһүлгэтигэр ситиһиилээхтик кытынным диэн саныыбын», — диэн Борис санаатын тириэртэ.
Борис чахчы туох баар дьулуурун барытын кыайыы туһугар ууран киирсибитин бары көрөөччүлэр көрбүттэрэ уонна кини муҥутуур кыайыылаах аатын ылбытыгар ис истэриттэн үөрбүттэрэ. Кинилэр ортолоругар тэбис тэҥҥэ Дыгын оонньууларыгар кыттыыны ылбыт биир дойдулаахпыт, эмиэ бэйэтин кэккэ кыайыылаарынан биһигини үөрдүбүт Тимофей Большаков эмиэ баара. Бориһы кини дойдутугар кэлбитин үөрэ-көтө көрүстэ.
«Дьиҥинэн Борис былырыын бастыахтаах этэ. Онно сыыһа-халты хамсаныылары оҥорон кэбиһэн, кыл мүччү бастаабатаҕа. Кини онон быйылгы Дыгын Оонньууларыгар хайаан да кыайыахтаахпыт диэн санаалаах, ааспыт сүүмэрдээһиннэргэ күүскэ кыттыбыта. Ол сүүмэрдээһини бииргэ ааспыппыт. Састаап олус күүстээх этэ. Онон кини хайаатар да үчүгэй түмүгү көрдөрүө диэн эрэллээх этим. Оннук буолла. Кыаҕын барытын көрдөрөн уолбут үрдүк чыпчаалга таҕыстаҕа дии. Быйылгы оонньууларга чахчы күн-дьыл тургутта. Күрэхтэһэргэ уустук этэ. Бэйэм үс иһигэр киирэрбэр кып кыра тиийбэтэ. Бастакы киирсиилэргэ табыллыбакка, онтум оҕуста» , — диэн Тимофей санаатын тириэртэ.
Киэн туттар биир дойдулаахтарын чапчылҕаннар арыылаах алаадьынан,кыынньар кымыһынан, хоту дойду минньигэс кыһыллыбыт балыгынан күндүлээтилэр, уруйдаан -айхаллаан кини кыайыытынан киэн тутталларын биллэрдилэр. Эҕэрдэ тылларын нэһилиэк баһылыга Дьулустан Юшков, улуус дьокутаата, үөрэппит учуутала Эльвира Пестерева, оскуолатын кэлэктиибин аатыттан дириэктэр Оксана Емельянова тириэртилэр. Бу күн Борис муҥутуур кыайыылаах мэтээлин тутан турар хаартыскатыгар бэйэтин автограбын биэрдэ, баҕалаахтары кытта истиҥ мичээринэн хаартыскаҕа түстэ. Куруутун бу курдук сырдыгынан сыдьаайа, ситиһии арыаллаах сырыт, дойдун сылаас тыына эрэлгэр эрэл, күүскэр күүс эптин, биһиги Мичээр Боотурбут!
«Амма олоҕо» хаһыат