Бэҕэһээ Дьокуускай куоракка “Биир ньыгыл Арассыыйа” ПП бастакы сүһүөх салаалар сэкэрэтээрдэрин форума буолан ааста. Амма улууһуттан түөрт киһиттэн састааптаах дэлэгээссийэ киирэн кытынна. Мээндиги нэһилиэгин баһылыга Илья Семенов эмиэ форумҥа кыттыыны ылан, бэркэ сэргээн, элбэҕи билэн тахсыбытын, инникитин маннык тэрээһиннэр өссө буола туралларыгар баҕа санаалаах.
“Быйылгы сылы “Биир ньыгыл Арассыыйа” баартыйа бастакы сүһүөх салааларын сылынан биллэрбитэ. Ол чэрчитинэн форум ыытылынна. Олус диэн туһалаах, элбэх тэрээһиннэрдээх форум буолла. Күн солото суох сырыттыбыт. Ол курдук эбиэккэ диэри баартыйа бырайыактарынан тутуллубут үс былаһааккаҕа сырыттыбыт. Бастакытынан устудьуоннар олорор кыбаарталларыгар олохтоох ийэлэр бэйэлэрэ түмсэн былаһаакка оҥорбуттарын көрдүбүт. Онтон ДСК оройуонугар баар 10 №-дээх оҕо спортивнай оскуолатыгар сырыттыбыт. Улахан уораҕай эбит. Бэйэтигэр муус дыбарыастаах. Манна керлинг спорт көрүҥүнэн дьарыктаналлар эбит. Инвентардарын барытын Сочиттан аҕалбыттар.
Ону кытта Михаил Николаев аатынан 40№-дээх оскуолаҕа сырыттыбыт. Дьэ эмиэ сөҕүү бөҕө буоллубут. 1200 – тахса оҕо үөрэнэр эбит да, олох биллибэттэр. Аны көрүстэхтэринэ “”үтүө күнүнэн”, “үтүө сарсыарда” диэн эҕэрдэлии көрсөллөрө истиэххэ олус үчүгэй. Кабинеттара, көрүдүөрдэрэ наһаа сиэдэрэй. Туох барыта баар. Оҕо үөрэнэригэр усулуобуйа оҥоһуллубут. Мин сөхпүтүм диэн оскуола оҕолоро сылга биирдэ остолобуойга дьуһуурустубалыыллар эбит. Кылаастарын бэйэлэрэ хомуйаллар. Маннык система Японияҕа баар дии. Биһиги да эмиэ сэбиэскэй кэмҥэ бу курдук систиэмэлээх этибит. Ол оҕону үлэҕэ иитэргэ, эппиэтинэстээх буоларга үөрэтэр. Манна өссө остолобуойдарыгар робот ас тарҕатар эбит.
Эбиэттэн киэһэ профсоюзтар дьиэлэригэр пленарнай мунньахпыт буолла. Манна “Биир ньыгыл Арассыыйа” биир хайысхатынан, норуодунай фронт бырагыраамаларынан үлэлээтибит, өссө инники туох киириэн сөбүн кэпсэттибит. Оробуочай бөлөхтөр тэрилиннилэр. Онно киирдибит. Амматтан Соморсун баһылыга Алексей Юрьевич Кононов, Абаҕаттан баһылык эбээһинэһин толорооччу Александр Павлович Дьячковскай уонна улуус дьокутааттарын сэбиэтиттэн сэкэрэтээр Ирина Ивановна Ушницкая буолан сырыттыбыт. Түмүккэ маннык бастакы сүһүөх тэрилтэлэр көрсөллөрө, уопуттарын атастаһаллара наадалаах диэн эттилэр. Саамай кылаабынай биһиги санаабытын, этиилэрбитин этэр саамай сүрүн былаһаакка буолуон сөп диэн санааҕа кэллим. Онон маннык түмсүүлэр улууспутугар да элбэхтэ ыытыллыахтарын наада эбит. Онон наһаа туһалаах формуҥа сылдьаммыт элбэҕи билэн, инники үлэбитигэр толкуйдары ыллыбыт”, — диэн Илья Владимирович санаатын үллэһиннэ.
“Амма олоҕо” хаһыат