Абаҕа эр дьонун көҕүлээhининэн сыллата нэhилиэк бэтэрээннэригэр, анал байыаннай дьайыыга сылдьар байыастар дьиэ кэргэттэригэр муус ылыытыгар субуотунньук тэриллэрэ үтүө үгэс буолла. Быйыл да көхтөөх субуотунньук тэриллэн, уопсайа 45 ыалга ыраас муус киирдэ.
Субуотунньукка оскуола үөрэнээччилэрин эмиэ кыттыһыннаран, өбүгэ үгэһигэр үөрэтэн, үлэ-хамнас күөстүү оргуйда. Күнэ да туран биэрэн, ааспыты-хойуккуну санаhан, сэргэхтик сэлэhэн, эр дьон бары биир санаанан салайтаран, үтүө дьыалаҕа кыттыстылар, бары биир киhи курдук көхтөөхтүк үлэлээтилэр.
“Үлэбит быыhыгар оскуола оҕолоругар сүүрүүгэ күрэх буолла. Онно быhый атахтаах 7 кылаас үөрэнээччитэ Богдан Устинов тэҥнээҕин булбата. Киниэхэ түмсүү аатыттан харчынан бириис туттардыбыт. Улахан дьон эмиэ оҕолортон хаалсыбакка, сынньалан кэмигэр тэттик оонньуу оонньоотулар. Манна Егор Гоголев кыайыылаах буолан биир хаа ботуруонунан наҕараадаланна.
Онон олус туhалаах, бэртээхэй күн буолла. Ыҥырыыбытын ылынан, өрүүтүн өйүүр техникалаах дьоммутугар, Анатолий Белолюбскайга, Александр Беляевка, Василий Карповка, Сергей Сутаковка, Павел Кириллиҥҥэ, көхтөөхтүк кыттыспыт оскуолабыт үөрэнээччилэригэр, салайааччылара Артем Захаровка уонна бары кыттыспыт тэрилтэлэрбитигэр, нэhилиэкпит эр дьонугар махтал мааныта буоллун! Куруутун маннык биир санаанан салайтаран сылдьыахха, Абаҕабыт сайдарын туhугар үлэлиэххэ-хамсыахха, саҥаны-сонуну айыахха-тутуохха”, — диэн нэһилиэк эр дьонун түмсүүтүн салайааччыта Александр Дьячковскай сырдатта.
“Амма олоҕо” хаһыат