Өбүгэлэрбит күөххэ үктэммиттэрин бэлиэтиир ытыктанар, улахан суолталаах уонна күүтүүлээх бырааһынньыктарынан Ньукуолун буолар. Бу таҥара күнүн ылыы былыр нуучча норуота кэлиититтэн саҕаланар. Ньукуолун күнүттэн сахаларга саҥа сыл саҕаланар. Бу төрүт үгэһи суолтаҕа ууран Алтан нэһилиэгин доруобуйаларынан хааччахтаах дьонун кытары Сылгы Бастаах сиригэр-уотугар көрүстүбүт.
Алтаҥҥа нэһилиэк доруобуйаларынан хааччахтаах дьоно «Чэбдик» диэн түмсүү тэринэн үлэлээбиттэрэ-хамсаабыттара быданнаата. Бу түмсүүнү 2010 сыллаахха, оччолорго нэһилиэк баһылыгын социальнай боппуруостарга солбуйааччыта Сардаана Верховская уонна социальнай үлэһит Саргылана Степанова тэрийбиттэрэ. Оччолортон саҕахтаммыт түмсүүнү күн бүгүн Любовь Попова сатабыллаахтык салайан олорор, киниэхэ төһүү күүһүнэн доруобуйаларынан хааччахтаах оҕолоох төрөппүттэр Валентина Неустроева, Ирина Ильина, түмсүү актыыбынай чилиэнэ Мария Лыткина уонна нэһилиэк социальнай үлэһитэ Айталина Сутакова буолаллар.
Сылга хайаатар да көрсүһэр түгэммитин мүччү туппакка, сайыны уруйдуу Үрүҥ тунах ыһыах ыытыллар сиригэр түмүстүбүт. Көһөрүллэн-көһөрүллэн бэлиэ тэрээһиммит бэртээхэй күҥҥэ түбэстэ. Чахчы сайыҥҥылыы сылаас күн туран биэрдэ. Саамай саастаах ыалдьыппытынан нэһилиэк үлэтин-хамнаһын өссө сойуус саҕана уһун сылларга урууллаан олорбут Коммунар Михайлович Ермолаев буолар. Сайыны көрсөр күммүт бэрт тэрээһиннээхтик, буруолуу сылдьар кус мииннээх, сандалы остуоллаах, оонньуулаах-көрдөөх ааста. Олохтоох дьаһалта исписэлииһэ Сергей Захаров, социальнай үлэһит Айталина Сутакова бэртээхэй оонньуулары ыыттылар, бырааһынньык остуолун урууллаатылар. Мустубут дьон ис-истэриттэн махтанан тарҕастылар.
Татьяна Атласова.