Мэҥэ Хаҥалас улууһун Бүтэйдээх нэһилиэгэр үтүө үгэс буолбут Суола үрэх сүнньүгэр олорор нэһилиэктэр бэтэрээннэрин икки ардыларыгар сыллата ыытыллар спартакиада 10 сыллаах үбүлүөйүнэй күрэҕэ ыытылынна. Бу кустовой күрэх спорт энтузиастара, Алтантан Иван Сентизов, Сатаҕайтан Гаврил Орлов көҕүлээһиннэринэн саҕаламмыта.
Быйылгы спартакиадаҕа Чурапчы Хайахсытыттан, Мэҥэ-Хаҥалас Өлөчөйүттэн, Бүтэйдээҕиттэн, Амма Сатаҕайыттан, Алтаныттан биэс хамаанда спорт 8 көрүҥэр күөн көрүстүлэр. Уопсай түмүккэ 15 очукуону ылан Бүтэйдээх хамаандата бастакы миэстэни, 20 очукуолаах Хайахсыт хамаандата иккиһи, 23 очукуолаах Алтан хамаандата үһүс миэстэни ыллылар. Биһиги нэһилиэк бэтэрээннэрин хамаандатын көрүҥнэринэн миэстэлэрэ:
Дуобат — 3 миэстэ (6,5 очукуо), саахымат — 2 миэстэ (6,5 очукуо), хабылык, хаамыска — 4 миэстэ (26 очукуо), остуол тенниһэ — 3 миэстэ (10 очукуо), СахаВабол — 2 миэстэ (6 очукуо), миэстэттэн ыстаныы — 1 миэстэ (17,60 м), ох саанан ытыы — 5 миэстэ (15 очукуо), салгын саатынан ытыы — 3 миэстэ (107 очукуо). Көрүҥнэринэн миэстэлэспит кыттааччыларбыт: Федор Тихонов хабылыкка, хаамыскаҕа 3 миэстэ, Иван Сентизов дуобакка 3 миэстэ, Ольга Никифорова саахымакка 2 миэстэ, Василий Сутаков дуобакка 3 миэстэ, Михаил Гаврильев саахымакка 2 дуоскаҕа 3 миэстэ, Прохор Сутаков саахымакка 1 дуоскаҕа 3 миэстэ, Людмила Сентизова остуол тенниһигэр 2 миэстэ, Михаил Дьячковскай остуол тенниһигэр 3 миэстэ, Алексей Адамов ох саанан ытыыга 3 миэстэ.
Маны таһынан Сентизовтар «Спорду өрө тутар дьиэ-кэргэн», Людмила Сентизова СахаВаболга «Бастыҥ оонньооччу» уонна Ольга Никифорова «Аҕам саастаах кыттааччы» анал ааттары ыллылар.
Тыа сирин дьоно күннээҕи түбүгүнэн, үлэнэн эрэ муҥурдаммакка, спорду эмиэ өрө тутан сыллата көрсүһэн күрэхтэри ыыталларын биһиги эрэ буолбакка, атын да нэһилиэктэр сэргии, сөҕө-махтайа истэллэр. Бу курдук Амма улууһун хотугулуу-арҕаа туһаайыытынан сытар нэһилиэктэр төһө да кытыы буолларбыт бэрт сэргэхтик олоробут.
Татьяна АТЛАСОВА