Амматааҕы Н.С. Захаров -Сахаачча аатынан оҕо спортивнай оскуолатын көҥүл тустууга салаатын иитиллээччилэрэ Амурскай уобаласка баран ситиһиилээхтик кыттан кэлбиттэрэ, бириистээх миэстэлэри ылан пьедестал үрдэллэригэр турбуттара. Онтон бу соторутааҕыта Владивосток куоракка буолан ааспыт Бүтүн Арассыыйатааҕы турнирыттан Ваня Павлов уонна Вася Вензель үрүҥ көмүс уонна боруонса мэтээли илдьэ кэллилэр.
Ааспыт өрөбүллэр күннэргэ Владивосток куоракка губернатор бирииһигэр ыытыллыбыт Бүтүн Арассыйатааҕы турнирга Ваня Павлов иккис миэстэ уонна Вася Вензель 3 миэстэ буоллулар. Ваня быйыл Чурапчытааҕы Д.П.Коркин аатынан спортивнай оскуолаҕа туттарсан киирэн 8 кылааска үөрэнэ сылдьар. Кинини 1 кылаастан Амма спортивнай оскуолатыгар көҥүл тустуу салаатыгар тренердэр Афанасий Адамовка, Иван Карповка уонна Степан Скрябиҥҥа дьарыктаммыта. Тренердэр кинини тустуу кистэлэҥнэригэр чочуйбуттара. Ваня оҕолорго манна үөрэнэ сылдьан өрөспүүбүлүкэ, Арассыыйа араас турнирдарыгар баран күрэхтэһэн миэстэлэспитэ. Быйыл күһүн Василий Гоголев аатынан улахан түһүлгэҕэ өрөспүүбүлүкэ чемпионун аатын ылбыта. Онтон Вася Вензель Өймөкөөн улууһун Уус Ньара бөһүөлэгиттэн төрүттээх. Аммаҕа 3 кылааска үөрэнэ кэлэн Степан Скрябиҥҥа, Афанасий Адамовка, Иван Карповка уонна Сырдык Айылгын Бойуот уолугар дьарыктана сылдьар. Билигин Амма 2 нүөмэрдээх оскуолатыгар 7 кылааска үөрэнэр. Оҕолорго өрөспүүбүлүкэ араас түһүлгэлэрин чемпиона уонна призера. Благовещенскай куоракка ыытыллыбыт аһаҕас турнирга 35 киилэҕэ үһүс буолбута, онтон бу салгыы хаалан Владивостокка баран эмиэ 3 миэстэни ылары ситистэ.
Спортивнай оскуола иитиллээччилэрэ сэтинньи ый саҥатыгар Благовщенскай куоракка гвардия капитана Владислав Мазурков сырдык аатыгар ыытыллыбыт куорат аһаҕас турнирыгар кыттыбыттара. Манна уолаттары тренердэр Айылгын Бойуот уола уонна Степан Скрябин илдьэ сылдьыбыттара.
Манна 2014-2015 с.т. уолаттарга 28 киилэҕэ Сутаков Даниель (Алтан) бастакы, Дигуров Даниил (Аллайыаха-Амма), Винокуров Эрхаан (Амма) үһүс миэстэни, 30 киилэҕэ, Пахомов Дьулустаан (Амма) үһүс, 60 киилэҕэ Макаров Дархан (Амма) иккис, 2012-2013 с.т. уолаттарга 41 киилэҕэ Никифоров Николай (Амма) бастакы, 44 киилэҕэ Антонов Андрей (Амма) үһүс, 35 киилэҕэ Вензель Василий (Өймөкөөн-Амма) үһүс уонна Попов Даниил (Амма) үһүс миэстэни ылбыттара. Оҕолор бу ситиһиилэрэ кинилэр сайын спортивнай оскуола «Олимп» лааҕырыгар эрчиллибиттэрин, сынньаммытын биир ситиһиитэ диэн тренердэр бэлиэтииллэр. Уолаттары, тренердэри бу ситиһиилэринэн эҕэрдэлиибит уонна өссө да маннык улахан түһүлгэлэргэ Аммаларын аатын ааттата туруоххут диэн эрэнэбит.
“Амма олоҕо” хаһыат