Амматааҕы Н.С. Захаров –Сахаачча аатынан оҕо спортивнай оскуолатын көҥүл тустууга салаатын иитиллээччитэ Арылхан Гаврильев бу күннэргэ кыһыл уонна үрүҥ көмүс мэтээллэри ылары ситистэ.
“Олунньу ый 16- 20 күннэригэр Орел куоракка греко-римскэй тустууга Арассыыйаҕа биирдиилээн бастыыр иһин күрэх буолан ааста. Манна биһиги иитиллээччибит Арылхан Гаврильев 23 диэри саастаах үчүгэйдик истибэттэр спортарыгар, ыччаттар ортолоругар греко- римскай тустууга 72 киилэҕэ үрүҥ көмүс призер буолла. Бу кэнниттэн көҥүл тустууга 74 киилэҕэ кыайыылаах үрдүк аатын ситистэ.
Онон Арассыыйа сүүмэрдиир хамаандатыгар киирэн, салгыы табылыннаҕына Аан дойдуга биирдиилээн бастыыр иһин баран күрэхтэһиэҕэ. Арылхан билигин Дьокуускай куоракка Василий Егорович Стручков, Эрчимэн Григорьевич Макаров, Василий Янович Стрекаловскай салалталарынан эрчиллэ сылдьар. Арылхаҥҥа, тренердэргэ өссө үрдүк ситиһиилэри баҕарабын уонна махталбытын тириэрдэбит”, — диэн этэр бастакы тренерэ Афанасий Адамов.
“Амма олоҕо” хаһыат