Соторутааҕыта «Россия ийэлэрэ» Саха сиринээҕи салаата 10 сыллаах үбүлүөйүн бэлиэтээтэ. Биир холобур буолар үлэлээх Амматааҕы салаа “Үлэ аргыстаах эдэр саас» бырайыагын туһунан кэпсиир, уопутун тарҕатар сыаллаах региональнай сэбиэти кытта көрүстэ. Салайааччы Оксана Архипова, бырайыак ааптардара Наталья Борисова, Римма Дьячковская урукку ыччат өйүн-санаатын, үлэтин- хамнаһын туһунан сырдатан, кинилэр үлэнэн иитиллэн дойдуларын сайыннарыыга улахан кылааттарын киллэрбиттэрин өйдөтөн, кэлэр кэнчээри ыччаты иитиигэ бу үлэ олус туһалааҕын бэлиэтээтилэр. Бу бырайыакка кыттыһан ”Россия ийэлэрэ” Саха сиринээҕи хамсааһын салайааччыта Прасковья Борисова уонна сэбиэт чилиэннэрэ Анна Соловьева, Яна Никитина үлэлэрин кэпсээн видеоҕа уһуллан үйэтитилиннилэр.
Бу хамаанда бырайыак уопутун тарҕата Хаҥалас улууһун дьаһалтатын кытта көрүстүлэр, ол түмүгэр улуус хаһыатын сирэйигэр “Үлэ аргыстаах эдэр саас» диэн барылы Амма дьоно көҕүлүүллэр” диэн Людмила Мордовская ааптардаах ыстатыйа таҕыста.
Бу ыстатыйаҕа төһө да манна майгынныыр бырайыактар улуус аайы баалларын үрдүнэн ситимҥэ киирэн хараллар бырайыактар суохтарын ыйан туран бэлиэтээтилэр. Ааспыт үйэ көлүөнэлэр үлэҕэ, тулалыыр эйгэҕэ сыһыаннара, дойдуларыгар тапталлара, олоххо сыаннастара видеоҕа уһуллан үйэтитиллэллэрэ хайҕаллаах, бу барыта саха омук итэҕэлигэр олоҕуран толкуйдаммыт бырайыак диэн аҕыннылар.
Муус устар 6 күнүгэр Нөмүгү нэһилиэгэр урукку кэмҥэ ньирэй көрөөччүнэн үлэлээбит Евдокия Ивановна, колхуос араас үлэтигэр түүлээх тутааччынан, сир боппуруостарын үлэһитинэн, сэбиэт солбуйааччытынан үлэлээбит Иван Петрович Никифоровтар олорбут көмүс ньээкэ уйаларыгар, билигин кыыстара Ольга Ивановна Никифорова олорор дьиэтигэр ыалдьыттаатылар. Манна Иван Петрович, Евдокия Ивановна оҕолоро Лариса Ивановна Никифорова, Людмила Ивановна Нестерева, Иван Иванович Никифоров, Анисия Ивановна Ефремова уонна аймахтара Татьяна Петровна Герасимова дьиэ кэргэттэрин, кинилэр саха төрүт дьарыктарын хайдах бүгүҥҥү күҥҥэ диэри илдьэ кэлбиттэрин туһунан сэһэннэрин, кэпсээннэрин уһуллулар.
Кинилэр оҕо эрдэхтэриттэн ийэлээх аҕаларыттан саха төрүт дьарыгар сыһыарыллан, эһээ, эбээ буолуохтарыгар диэри туора муостаахтарын илиилэриттэн араарбакка, оҕолорун,сиэннэрин үрүҥ аһынан аһатан, иитэн олорор, билиҥҥи кэмҥэ холобур буолар, үлэни өрө туппут, түмсүүлээх ыал буола тэнийбиттэриттэн сөҕө да, киэҥ тутта да саныыгын. Бу уһуллуу дойдубут президенэ В.В. Путин биллэрбит Дьиэ кэргэн сылыгар ананна.
Ити курдук “ Россия ийэлэрэ” Амматааҕы салаата “Үлэ аргыстаах эдэр саас» бырайыагын уопутун республикаҕа тарҕатан саҕалаата.
Матрена Карманова.