Бу күннэргэ хас биирдии нэһилиэккэ олохтоох бэйэни көҕүлээһин бырагырааматыгар кыттыыга үлэ-хамнас тэтимнээхтик барар. Бииртэн биир бырайыактар нэһилиэк социальнай олоҕун тупсарыыга киирэллэр.
Олохтоох көҕүлээһини өйүүр бырагыраама олоххо киириэҕиттэн Амма Наахара нэһилиэгэ куруутун көхтөөхтүк кыттар. Ол түмүгэр бырагыраама көмөтүнэн нэһилиэкпитигэр Кыайыы болуоссата өрөмүөннэммитэ, спортивнай саалаҕа эбии саҥардыы үлэтэ, сайыҥҥы уу ситимэ тардыллыбыта, киин ититии ситимин матырыйаала ылыллыбыта, спортивнай былаһаакка оҥоһуллубута. Кэлэр 2026 сылга олохтоох көҕүлээһини өйүүр бырагырааматыгар киирсэргэ үс бырайыак куоласка турда. Онон түмүктүүр мунньахха куоластааһыҥҥа сыбаалканы бэрээдэктээһин, кулуупка LED интерактивнай тэлэбиисэр, Дьыбадаах суолун тупсарыы бырайыактара киирбиттэрэ. Мантан олохтоохтор нэһилиэккэ сыбаалканы оҥоруу бырайыагар баһыйар куоластарын биэрдилэр. Мунньах кэнниттэн «Түмэн» СК туруорбут олохтоох нэһилиэнньэ күүһүнэн бэртээхэй кэнсиэр буолан ааста.
Сахаяна МИХАЙЛОВА