Саха Өрөспүүбүлүкэтин судаарыстыбаннаҺын күнүгэр Амма улууҺугар ыытыллыбыт төрөөбүт кыраайы үөрэтэр маршрут аахсыйатыгар Амма Наахара үөрэнээччилэрэ эмиэ кытыннылар.
1990 сыл балаҕан ыйын 27 күнүгэр Саха АССР уон иккис ыҥырыылаах Үрдүкү Сэбиэтэ Саха Өрөспүүбүлүкэтин судаарыстыбаннай суверенитетын туһунан Декларацияны ылыммыта. Бу историяҕа киирбит докумуон өрөспүүбүлүкэбит социальнай-экономическай өртүнэн бигэ туруктаах буолуутун, норуот духуобунай сайдыытын түстээбитэ.
Саха Өрөспүүбүлүкэтин СудаарыстыбаннаҺын күнүгэр анаан Амма Наахара орто оскуолатыгар үөрүүлээх тэрээҺиннэр буоллулар. Бу бэлиэ күҥҥэ оскуола үлэҺиттэрэ, үөрэнээччилэрэ бары сахалыы таҥаспытын кэтэн киэргэнэн кэллибит. Оскуолабыт фойетыгар үөрүүлээх линейка буолла. Дириэктэри иитэр үлэҕэ солбуйааччы Марина Макарова оҕолорго Саха Өрөспүүбүлүкэтэ хайдах бэйэни салайыныы быраабын туруорсубутун, Өрөспүүбүлүкэбит судаарыстыбаннаһын олохтонуутугар олук уурбут дьоннорун ааттаталаан, Саха Автономнай Сэбиэскэй Социалистическай өрөспүүбүлүкэтэ буолбуппутун кэпсээтэ. 1991 сыллаахха ахсынньы ыйга бастакы Бэрэсидьиэнинэн Михаил Николаев анаммытын оҕолор бары сэргээн иҺиттилэр. Оскуола лидерынан 9 кылаас үөрэнээччитэ Михайлова Алгыстаана талыллыбытын билиҺиннэрдэ. Алгыстаана мэктиэ тылын эттэ.
Онтон үөрэнээччилэргэ анаан кыраайы үөрэтэр маршрут саҕаланна. Маршрутка 3 бөлөххө арахсан сырыттыбыт.
БиҺиги, улахан 8-11 кылаас үөрэнээччилэрэ бастакынан нэҺилиэкпит Кыайыы болуоссатыгар сырыттыбыт. Манна нэҺилиэк баҺылыгын солбуйааччы Сахаяна Михайлова экскурсия ыытта, өйдөбүнньүк паамытынньыктар тустарынан кэпсээтэ. Оҕолор кини кэпсээнин интэриэҺиргээн иҺиттилэр уонна элбэх боппуруос биэрдилэр.
Салгыы Петр Ионович Яковлев аатынан оскуолабыт түмэлигэр сырыттыбыт. Салайааччы Наталья Ефремова нэҺилиэкпит историятын, колхоз төрүттэниитин, колхозка хоҺуун дьон үлэлээбиттэрин кэпсээтэ. Мин ол кэпсээнтэн аймахтарым туҺунан биллим. Мин саамай интэриэҺиргээбит маршрутум түмэл буолла. БүтэҺик маршрут — оскуола бибилэтиэкэтэ буолла. Педагог- бибилэтиэкэр Надежда Григорьева кинигэ быыстапкатын билиҺиннэрдэ. Өрөспүүбүлүкэбит судаарыстыбаннаһын олохтонуутугар олук уурбут дьоммутун Максим Аммосов, Платон Ойуунускай, Степан Аржаков, Исидор Барахов, Гавриил Чиряев, Габышев Александр уонна да атын салайааччылар туҺунан кэпсээтэ уонна «Кини кимий?» оонньууну оонньоотубут. Манна мэтириэттэри көрөн ким буоларын эттибит. Ити курдук П.И. Яковлев аатынан Амма Наахара оскуолатыгар Саха Өрөспүүбүлүкэтин СудаарыстыбыннаҺын күнэ бэрт сэргэхтик буолла. Маннык кыраайы үөрэтэр маршруттар төрөөбүт дойдубут, дьоммут -сэргэбит туҺунан билэрбитигэр туҺалаахтар, киҺи элбэҕи билэр.
Наина ЗЫКОВА, «Аартык» медиакиин