Амма Наахара нэһилиэгин “Дуораанчык” уһуйааныгар кырачаан коллекционердарга “Мин кэллиэксийэм” диэн II оҕо бэстибээлэ ыытылынна. Бэстибээли Арассыыйаҕа Норуоттар сомоҕолоһууларын, Саха сиригэр Култуура уонна Амма улууһугар тыа хаһаайыстыбатын сылынан нэһилиэк “Эгэлгэ” кэллиэксийэлээччилэр түмсүүлэрэ тэрийдэ.
“Маннык бэстибээли биһиги оҕолору кэллиэксийэлииргэ уһуйан, дьиэ кэргэн үгэстэригэр сыһыарын, араас күндү малларыгар интэриэһи үөскэтэр, кини билэр-көрөр баҕата улаатарыгар уһуйан ыытабыт. Бу иккис бэстибээлбит буолар. Оҕолор олус көхтөөхтүк кытыннылар, кэллиэксийэлэрэ арааһа биһигини үөртэ уонна сөхтөрдө. Күрэххэ 12 уһуйаан иитиллээччитэ кытынна. Ол курдук оҕолор арааһы барытын мунньаллар эбит. Ол курдук холобура Лева Гаврильев конструктордары мунньан араас үчүгэй техникалары оҥорбут, Айна Александрова капибара ойуулаах арааһы барытын мунньар эбит. Ол курдук араас көрүҥнээх, кээмэйдээх блокноттар, ону тэҥэ биһиги уруучука, ободок, заколка араастарын көрдүбүт, быһатын капибара ойуулаах арааһы барытын мунньарын сөхтүбүт. Сандаара Устинова значок мунньар эбит, ол значоктарын үчүгэй баҕайытык оҥорон көрдөрүүгэ туруорбут.
Харысхан Копырин брелоктары мунньубутун аҕалбыт, “Киндер” оонньуурдарын, динозаврдары уонна элбэх массыына оонньуурдарын аҕалан туруорда. Онтон оскуола оҕолоругар 24 оҕо кытынна. Кинилэр эмиэ арааһы мунньаллар эбит. Ол курдук значоктар, кэмпиэт суулара, уруучукалар, араас дьикти таастар, кумааҕы, тимир харчы мунньан саҕалаан эрэллэр эбит. Манна 109 устуука “киндер” оонньуурдара бааллар. Ону сэргэ магниттары, сымнаҕас оонньуурдары, лего эмиэ баар. Онон оҕолорбут наһаа үчүгэй дьарыктаахтарын, интэриэстээхтэрин көрөн астынныбыт”, — диэн “Эгэлгэ” түмсүү салайааччыта Лариса Унарова сырдатта.
Бэстибээлгэ кыттыбыт бары оҕолор сертификаттары туттулар.
“Амма олоҕо” хаһыат