Амма Наахаралар байыастарын, кырдьаҕастарын умнубаттар

Амма Наахараҕа нэһилиэк дьаһалтата, аҕалар түмсүүлэрэ саас аайы ыҥырыы таһааран эр дьону түмэн оттук маһы бэлэмнээһиҥҥэ субуотунньук тэрийэллэр. Бу күннэргэ 23 аҕа 50 куб маһы бэлэмнээн байыаннай дьайыыга сылдьар уолаттарбыт төрөппүттэригэр, Чечня сэриитин кыттыылааҕар, соҕотох олорор кырдьаҕастарга тиэйэн аҕалан үөртүлэр.

Трактористар Юрий Гаврильевич Александров, Эдуард Егорович Михайлов бириэмэтигэр маһы туһааннаах ыалларга тириэртилэр. Олохтоохтор Амма Наахара нэһилиэгин баһылыгар Захар Семенович Александровка, кини солбуйааччытыгар Сахаяна Иннокентьевна Михайловаҕа, аҕалар түмсүүлэригэр өрүү ахсаабат кыһамньыларын, билэ-көрө, көмөлөһө, өйүү олороллорун иһин махтаннылар. Субуотунньукка бөһүөлэк эр дьоно көхтөөхтүк кытынна. Кинилэргэ сылаас эбиэти Сахаяна Михайлова, Мария Заборовская бэлэмнээтилэр.
«Сүгэ кыайбатаҕын, сүбэ кыайар» диэн саха этиитэ мындыр өйдөөх, тобуллаҕас толкуйдаах, барыга көхтөөх дьону түмэ тардан өрүү күүс-көмө, сүбэ-ама буола турдун!

Ирина Корякина — Олесова.

Читайте дальше