Суол – олох хорук тымыра. Былаан быһыытынан, “Амма” айан суолун 2028 сылга диэри Майа сэлиэнньэтиттэн Чапчылҕаҥҥа диэри бүтүннүүтүн аспаал бүрүөһүннүүр сорук турар.
Хаһыат бастакы балаһатыгар атырдьах ыйын 26 күнүгэр Амма олохтоохторо өр кэтэспит “Амма” айан суолугар аспаалы бастакы ууруу үөрүүлээх түгэнэ буолла. Бу бэлиэ түгэҥҥэ Ил Дархан Айсен Николаев анаан-минээн кэлэн эҕэрдэлээтэ, суол хаачыстыбалаах буоларыгар, өр сыл туһалыырыгар баҕа санаатын тириэртэ.
Иккис балаһаҕа нэдиэлэ сүрүн сонуннарын сэргэ улууска оттооһун хаамыытын таблицата таҕыста. Атырдьах ыйын 26 күнүнээҕи туругунан улуус үрдүнэн 21563 туонна от охсуллан, 18653,5 туонна от кэбиһиллэн, былаан 64,5% туолан иһэр.
Хаһыат үһүс балаһатыгар сенатор Егор Борисов 70 сааһын көрсө Чурапчы улууһугар суруналыыстар пресс-десаннарыттан бэлиэтээһиннэр салгыы бэчээттэннилэр.
“Сельхозтехника” олбуоругар истиҥ кэпсэтии
Архыып-бибилэтиэкэҕэ көрсүһүүттэн
Бастаан салайааччы буолаат ыарыҕаппытым. “Хайдах бэйэбиттэн аҕа дьону, убайдарбын салайабын?” дии санаабытым. Оччолорго “Сельхозтехника” тэрилтэбит улахан үчүгэй эбийиэктэрэ суоҕа. Чурапчыга аан бастакы толору хааччыллыылаах 50 миэстэлээх оҕо садын киллэрбиппит. Салгыы 18 кыбартыыралаах икки таас дьиэни туппуппут. Спорт саала, мастарыскыай баар буолбуттара, — диэн кэпсиир Егор Афанасьевич.
Бу тутуулары ыытан “норуодунай хонтуруолга” көрүллэн турабын” диэн күлэр. Чахчыта да тыраахтардары, массыыналары өрөмүөннүөхтээх тэрилтэ улахан таас тутуулары ыыппыта соһуччу да буоллаҕа. Ол гынан баран, бу тэрилтэ ис кыахтааҕын, ону салайааччы таба туһаммытын туоһулуур дии саныыбын.
Хаһыат төрдүс балаһатыгар «Сатаҕай нэһилиэгэ» муниципальнай тэриллии баһылыгар кандидат Алексей Шишигин быыбар иннинээҕи бырагыраамата, итиэннэ Алексей Васильевич кандидатуратын өйүүр дьон ыҥырыылара таҕыстылар.
Санатан эттэххэ, балаҕан ыйын 8 күнүгэр Сатаҕай уонна Чакыр нэһилиэктэригэр баһылыктары талыы быыбара ыытыллыаҕа.
“Амма олоҕо” ыйга биирдэ тахсар “Киһи уонна сокуон” анал балаһатыгар Амма улууһун ис дьыалаҕа отделениетын холуобунай ирдэбилгэ салаатын начальнига, полиция майора Никита Дьячковскай төлөпүөнүнэн түөкүннээһин туһунан интервьюта таҕыста.
Билбэт нүөмэргит эрийдэҕинэ эппиэттээмэҥ. Алҕас ыллаххытына даҕаны, салгыы кэпсэтимэҥ, төлөпүөҥҥүтүн ууран кэбиһиҥ. Хаһан да, ханнык да түгэҥҥэ бэйэҕит банковскай реквизиттэргитин этимэҥ. Төлөпүөҥҥүтүгэр билбэт сыһыарыыларгытын хачайдаамаҥ, билбэт интернет сайтаргытыгар кииримэҥ. Ону сэргэ баан үлэһиттэрэ картаҕар баар харчыгын уораары гыммыттарын туһунан хаһан даҕаны эрийбэттэрин чуолкай өйдүөххүтүн наада, — диэн Никита Гаврильевич сүбэлиир.
“Редакция почтатыттан” рубрикаҕа Болугур олохтооҕо Елена Никифорова “Убаастыыр учууталбыт” диэн классическай (греко-римскэй) тустууга сахалартан бастакы спорт маастара Дмитрий Максимов туһунан истиҥ, иһирэх ахтыытын бэчээттээтибит.
Учууталбытыгар Дмитрий Гаврильевичка спорт – олоҕун сырдык сарыала, үрдүк үктэлэ, дабайар дабаана этэ, — диэн Елена Никифорова суруйар.
Вера ИВАНОВА.