Амматааҕы ойуур хаһаайыстыбатын салайааччыта Николай Иванов иһитиннэрбитинэн бүгүн, от ыйын 15 күнүн, сарсыардатын туругунан Амма улууһугар икки ойуур баһаара баар.
“Бүгүҥҥү күн туругунан улууспут территориятыгар 4А уонна 7А нүөмэрдээх баһаардар бэлиэтэнэллэр. 4А нүөмэрдээх баһаарга 81 киһи үлэлии сылдьар. Бу баһаар Болугур нэһилиэгиттэн 23 км сиргэ тахсыбыта. Күн бүгүн иэнэ 372 га буолла. Онтон 7 А нүөмэрдээх баһаарга 15 киһи үлэлии сылдьар. Бу эмиэ Болугур нэһилиэгиттэн 46 км сиргэ бэлиэтэммитэ. Манна 920 гаҕа умайа турар. От ыйын 13 күнүгэр киэһэ 8А нүөмэрдээх баһаар умуруоруллубута.
