Улуус баҺылыгын социальнай боппуруостарга солбуйааччыта Николай Ларионов салайааччылаах социальнай десант үлэтин Чакыр нэҺилиэгиттэн саҕалаата. Десант кыттыылаахтара нэҺилиэк олохтоохторун көрсөн иҺитиннэриилэри оҥордулар, боппуруостарга эппиэттээтилэр.
Чакыр нэҺилиэгэр десант үлэтэ култуура киинигэр нэҺилиэнньэ олохтоохторун кытта көрсүҺүүттэн саҕаланна. КөрсүҺүүгэ бэйэлэрин иҺитиннэриилэрин, оҥоҺуллар өҥөлөр, саҥа сылга уларыйыылар туҺунан дьарыктаах буолуу киин салайааччыта Лена Вензель, Арассыыйа социальнай фондатын клиентскэй сулууспатын Саха сиринээҕи Амма улууҺугар салаатын салайааччыта Алима Черноградская, эпиэкэ салаатын салайааччыта Саргылана Хван, социальнай бэлиитикэ уонна ыччат дьыалаларыгар салалтатын салайааччыта Саргылана Неустроева, улуустааҕы бэтэрээннэр Сэбиэттэрин бэрэссэдээтэлэ Мария Захарова кэпсээтилэр. Ол кэнниттэн боппуруостарга эппиэттээн баран, биирдиилээн дьону кытта үлэ ыытылынна. Чакырдар наадалаах исписэлиистэринэн биирдиилээн көрсөн тус консультациялары ыллылар. Десант сорох чилиэннэрэ ким оскуоланан, ким ыалларынан сырыттылар.
«Маннык десаннары тэрийии практиката биҺиги улууспутугар уруккуттан баар. НэҺилиэнньэ күүтэр-кэтэҺэр уонна сэҥээрэр. Тоҕо диэтэр тустаах үлэҺиттэри, исписэлиистэри кытта дьон кэлэн сирэй көрсөн кэпсэтэр, боппуруостарын биэрэр. Чакыр нэҺилиэгэр мин бэйэ күүҺүнэн тутуллубут оскуола мастарыскыайын, оскуоланы көрдүм, үлэҺиттэри кытта кэпсэттим. Десаммыт икки нэдиэлэ устата буолар. НэҺилиэктэри барытын хабабыт. Онон олохтоохтор десант кэллэҕинэ кэлэн көхтөөх кыттыыны ыларгытыгар ыҥырабыт ,- диэн этэр десант салайааччыта Николай Ларионов.
Социальнай десант сарсын Сулҕаччы, Сэргэ Бэс, Соморсун нэҺилиэктэригэр үлэлиэ.
«Амма олоҕо» хаҺыат