Соморсун нэһилиэгэр, Дойду үрдүнэн бэлиэтэнэр Олохтоох бэйэни салайыныы күнүн чэрчитинэн, нэһилиэк сайдыытыгар туһуламмыт бырайыактары көрүү, көмүскээһин ыытылынна. Ханнык бырайыактар биһирэбили ыллылар?
Барыта үс хайысханан 8 бырайыак көмүскэннэ. Ол курдук бырайыактар ис хоһоонноро сүрүннээн нэһилиэккэ тупсаран оҥоруу үлэлэрин ыытыыга, историческай суолталаах тэрээһиннэри тэрийиигэ, дьон олоҕо-дьаһаҕа тупсарыгар туһуламмыт бэйэ дьыалатын тэрийиигэ анаммыттар. Дэриэбинэ тас көстүүтүн тупсарыыга А.П. Рязанскай аатынан Соморсун орто оскуолатын эдэр учууталларын «Установка инсталляций (арт объектов) в живописных местах наслега» диэн бырайыактара бастыҥынан ааттанна. Оскуола историческай суолталаах тэрээһиннэр хайысхаҕа «Айастаан-творящий добро» бырайыактара эмиэ бастыҥынан бэлиэтэннэ. Маны таһынан, Нина Карманова норуот тапталлаах ырыаһыта Ольга Иванова –Сидоркевичка аналлаах сквер, Соморсун орто оскуолатын учууталлара, үөрэнээччилэрин уонна кинилэр төрөппүттэрэ кыттыгас Василий Егорович Васильев – Харысхал төрөөбүтэ 75 сылынан “Далекая и близкая война” испиктээх туруоруутун бырайыактара, дьоҕус биисинэһи сайыннарыыга орто оскуола үөрэнээччилэрэ Айтал Емельянов уонна Ян Григорьев «Сервисный центр “Элэһин”, “Сылгы комплексын тэрийии”, Эльвира Баранова “Массааһынан эмтиир чэбдигирдэр балаҕана”, Анна Борохина “Ретро музей тэрээһинин” бырайыактара дьүүллүүр сүбэ сэҥээриитин ыллылар.
Бу тэрээһин чэрчитинэн, Амма улууһун нэһилиэнньэ социальнай көмүскэлин биир кэлим киинин үлэһиттэрэ социальнай десанынан кэлэн кыттыыны ыллылар. Ол курдук, нэһилиэк сайдыытыгар туһуламмыт бырайыактар көрүүлэригэр дьүүллэстилэр, социальнай контракт туһунан нэһилиэнньэҕэ билиһиннэрдилэр, биирдиилээн дьоҥҥо сүбэлэри, контракт ылбыт дьоннору биирдиилээн, бырайыактарын хаамыытын бэрэбиэркэлээн, нэһилиэк активын кытта ыарахан балаһыанньалаах дьиэ кэргэттэри кытта үлэҕэ тула кэпсэттилэр, оскуола оҕолоругар профилактическай кылаас чаастарын ыыттылар, валяние техникатыгар маастар кылаас оҥордулар, биирдиилээн психологическай консультациялары оҥорон киэн ис хоһоонноох үлэни тэрийэн бардылар. Түгэнинэн туһанан десант кыттыылаахтарыгар барыларыгар истиҥ махталбытын тиэрдэбит.
Тэрээһин чэрчитинэн нэһилиэкпит иһинэн, социальнай контракт нөҥүө көмө ылан, бэйэ дьыалатын тэринэн, оҥорон таһаарар атыы-эргиэн (минньигэс торт, таҥас — сап, симэх-киэргэл, ас-үөл, рассада арааһа) быыстапката тэриллиннэ. Бу курдук, бэйэни салайыныыга, нэһилиэкпит сайдыытыгар хас биирдии олохтоох бэйэтинэн көҕүлээн, көхтөөхтүк кыттар буоллаҕына, ол нэһилиэк инникитэ кэскиллээх, сарсыҥҥыта саргылаах буолар.
Надежда БЕЛОЛЮБСКАЯ