Дойду Бэрэсидьиэнэ Владимир Путин көҕүлээбит национальнай бырайыактарыттан биирдэстэрэ “Технологическое обеспечение продовольственной безопасности” диэн буолар. Бу бырайыак чэрчитинэн “Кадры в АПК” федеральнай бырайыагынан быйылгы үөрэх дьылыгар Амма улууһугар бастакы агрокылаастар аһылыннылар. Ол иһигэр бүгүн бастакы үөрэх дьылын саҕалыыр Билии күнүгэр Н.Е. Иванов аатынан Бөтүҥ орто агрооскуолатыгар агротехнлогическай кылаас аалай лиэнтэтин быстылар.
Үөрүүлээх бэлиэ тэрээһиҥҥэ улуус тыатын хаһаайыстыбатын управлениетын салайааччыта Ион Кононов, оскуола дириэктэрэ Алексей Никитин эҕэрдэ тылларын эттилэр. Кыттыыны нэһилиэк баһылыга Саргылана Борисова, өрөспүүбүлүкэтээҕи учууталлар идэлэрин үрдэтэр институт дириэктэрэ Юрий Шишигин, улуустааҕы үөрэх управлениетын салайааччытын солбуйааччы Акулина Иванова ыллылар. Кылаас арыллыбытын туоһулуур аалай лиэнтэни Ион Кононов, биология учуутала Ида Назарова уонна 7-с кылаас үөрэнээччитэ Ньургун Осипов дохсун ытыс тыаһын ортотугар быстылар.
Бөтүҥ оскуолатын үөрэнээччилэрин, кэлэктииби агрокылаас арыллыбытынан СӨ тыатын хаһаайыстыбатын миниистирин э.т. Анна Стручкова видеосибээһинэн эҕэрдэлээтэ, ситиһиилээх үөрэх дьылын баҕарда. Мустубут дьоҥҥо сайын устата оҕуруот үүннэриитигэр «Быйаҥ» сайыҥҥы лааҕырга үлэлээбит кыргыттар үлэлэрин кылгастык билиһиннэрдилэр. Маннык кылаас аһыллан кинилэр үүнээйини көрүүлэригэр өссө үгүс билиини ылыахтара турдаҕа.
“Биһиги оскуолабытыгар чахчы бүгүн ураты күн буолла. Ол курдук федеральнай бырагырааманан өрөспүүбүлүкэ үрдүнэн 9 агрокылаас арыллыахтааҕыттан, биир толору хааччыллыбыт агрокылаас биһиги оскуолабытыгар кэлбититтэн олус диэн үөрэн турабыт. Өссө биир агрокылаас Амма 1 нүөмэрдээх оскуолатыгар арыллыахтаах. Онон бу кылаас арылларыгар күүс-көмө, өйөбүл буолбут өрөспүүбүлүкэ тыатын хаһаайыстыбатын министиэристибэтигэр, улууспут тыатын хаһаайыстыбатын управлениетыгар, үөрэҕин салаатыгар махталбыт муҥура суох. Күн бүгүн оборудованиебыт 40-ча бырыһыан кэлэн турар. Ол курдук кылааска билигин 10 ноутбук, парталар, интерактивнай панель, экобокс диэн оборудование кэлэн турдулар. Өссө агролаборатория, “умная гидропоника” диэн оборудованиелар кэлиэхтээхтэр. Манна 7-8 кылаастар үөрэниэхтэрэ. Үөрэнээччилэр кылааска биология уруогар “Генетика и селекция растений” диэн хайысханы дириҥэтэн үөрэтиэхтэрэ. Бу бырагыраама тыа хаһаайыстыбатын эйгэтигэр исписэлиистэри бэлэмнииргэ төһүү буолуо диэн эрэнэбин”, — диэн оскуола дириэктэрэ Алексей Никитин сырдатар.
Быйылгы үөрэх дьылын үөрүүлээх линейкатыгар тыа хаһаайыстыбатын управлениетын салайааччыта Ион Кононов оскуолаҕа кэлэктиибигэр Эҕэрдэ суругун , 10 киилэ ынах арыытын ылыыга сертификат туттарда. Ону тэҥэ өр сыл оскуолаҕа эбии үөрэхтээһин педагогунан үлэлээбит Альбина Петрованы “Амма улууһун тыатын хаһаайыстыбатын сайдыытыгар кылаатын иһин” диэн бэлиэнэн наҕараадалаата.
Агрокылаас туһунан өссө сиһилии хаһыаппытыгар билиһиннэриэхпит. Сурутун, ааҕын. Суруллубут суоруллубат.
“Амма олоҕо” хаһыат