“Бөтүҥ” ТХПК быйылгы улууска биллэриллибит Тыа хаһаайыстыбатын сылыгар өссө биир наадалаах, өр сыл туруорсубут техникатынан байытылынна. Амма улууһун баһылыга Степан Кузьмин хаһаайыстыба сиригэр-уотугар тахсан “Дон” диэн сиилэстиир комбайын күлүүһүн саҥа техниканы үлэлэтэ сылдьар Анатолий Сивцевкэ туттарда.
Саҥа техниканы ылар бэлиэ үөрүүлээх түгэҥҥэ кыттыыны улуус баһылыга Степан Кузьмин, улуус тыатын хаһаайыстыбатын салайааччыта Ион Кононов, Бөтүҥ нэһилиэгин баһылыга Саргылана Борисова, “Бөтүҥ” ТХПК бэрэссэдээтэлэ Дмитрий Левин ыланнар эҕэрдэ тылларын тириэртилэр, сахалыы сиэринэн алгыстаатылар.
Техника хаһаайыстыбаҕа кэлэн, эбии аһылык бэлэмигэр тахсан бэҕэһээҥҥиттэн сиилэскэ диэн үүннэриллибит эбиэһи быһа сылдьар. Хаһаайыстыба бу иннинэ маннык сиилэстиир комбайны “Абаҕа” ХЭТ-тэн уларсара. Ол биллэн туран үлэни кэмигэр бүтэриигэ харгыстаах буолар буоллаҕа. Онон дьэ үлэһиттэр үлэлиир усулуобуйа тэриллэн, күн-дьыл туран эрэ биэрдэр үүнүүнү кэмигэр хомуйар буолбуттарыттан үөрүүлэрэ улахан.
“Бу техникабытын олус туһалаахтык уонна көдьүүстээхтик үлэлиир “Кормопроизводство” бырагырааматынан хас эмэ сыл туруорсан, хас эмэ сыл сайаапкалаан ыллыбыт. Онон быйыл улууспутугар биллэриллибит Тыа хаһаайыстыбатын сыла биһиэхэ соргулаах буолла. Техника бэйэтин сыанат 10 мөл. солкуобай курдук. Бырагыраама балаһыанньатынан хаһаайыстыба мантан 30 бырыһыанын уйунар. Ону кытта манна өрөспүүбүлүкэ, улуус уонна олохтоох бюджет кыттыһар. Онон биһиги техниканы ылыыбытыгар күүс-көмө буолбут үрдүкү салалталарбытыгар махталбыт улахан. Саҥа сиилэстиир комбайыммыт биһиэхэ эбии аһылыгы бэлэмнээһиммитигэр саамай наадалаах. Этэллэрин курдук сүөһү бородууксуйта тылыгар. Онон төһө иҥэмтиэлээх аһылыгы хороҕор муостаахпытыгар биэрэбит да, соччонон эмис эти, өлгөм үүтү ылыахпыт. Бу иннинэ хас да сыл устата “Абаҕа” хаһаайыстыбаттан комбайн кэлэн быстарар этэ. Ол биллэн туран үлэни кэмигэр бүтэрэргэ охсуулаах этэ буоллаҕа. Кинилэр сиилэстэрин быстарбыттарын кэннэ биирдэ ылар этэ. Билигин бэйэбит бириэмэтигэр киирэн быһыыбытын саҕалаатыбыт. 1000 туоннаны угар былааннаахпыт. Комбайыҥҥа уопуттаах үлэһиппит Анатолий Сивцев олордо. Сиилэһи дьаамаҕа уопуттаах комбайнербут Иван Сутаков тэбистэрэ сылдьар. Биир баҕа санаам диэн инникитин өрөспүүбүлүкэ салалтата маннык бырагыраамаларга үбүлээһини көрүүгэ хайа улуус төһө ыһыылааҕыттан, сүөһүлээҕиттэн көрөн оҥороллоро буоллар. Оччотугар хаһаайыстыбалар техниканан да хааччыллыылара да, эбийиэктэри да тутуулара өссө көдьүүстээх буолуо этэ”, — диэн “Бөтүҥ” ТХПК бэрэссэдээтэлэ Дмитрий Левин санаатын үллэһиннэ.
Амма улууһун баһылыга Степан Кузьмин хаһаайыстыбаны, бары олохтоохтору саҥа техника ылыллыбытынан эҕэрдэлээтэ уонна үлэһит дьоннор баар буоланнар маннык техникалар кэлэллэр диэн эттэ. Кини саҥа кэлбит техниканы үчүгэйдик сыа сым курдук тутан, харыстаан илдьэ сылдьалларыгар, инникитин улуус салалтата туох кыалларынан үлэҕэ-хамнаска туһалаах бырагыраамаларга кытта уонна көмөлөһө туруо диэн эттэ.
“Амма олоҕо” хаһыат