Бүгүн Амма нэһилиэгэр “Дружба” спортсаалатыгар улууска биллэриллибит Тыа хаһаайыстыбатын сылынан ыытыллар комплекснай спартакиада 13 күрэҕэ, төрүт ох саанан ытыыга ыытылынна. Наадалаах очукуолары хайа нэһилиэктэр суруннулар?
Тыа хаһаайыстыбатын сылыгар анаан ыытыллар нэһилиэктэр икки ардыларыгар комплекснай спартакиада зачетугар киирэр төрүт ох саанан ытыы күрэхтэһиитигэр уопсайа 14 нэһилиэктэн 11 нэһилиэк киирэн кыттыыны ылла. Күрэхтэһиини ыытар Амма нэһилиэгэ икки хамаанданы туруоран, уопсайа 12 хамаанда бастыҥы былдьастылар. Хамаандаҕа 3 эр киһи, 3 дьахтар киирдилэр. Күрэхтэһии икки этабынан барда.
Ол курдук бастаан хамаандалар бары ыттылар. Ол түмүгүнэн Абаҕа 54, Амма Наахара 78 , Амма — 1 хамаандата 80, Соморсун 48, Сатаҕай 46, Эмис 43 очко, Чакыр 35, Алтан 22 очко, Сулҕаччы 21, Чапчылҕан 17, Мээндиги 11 очколаннылар. Онон иккис этапка, финалга түөрт нэһилиэк киирдэ. Ол курдук Амма -1, Амма Наахара, Абаҕа уонна Соморсун хамаандалара. Амма -2 хамаандата соморсуннартан биир очконан хаалан кыайан финалга киирбэтэ.
Дьэ онон быһаарыылаах киирсиигэ Абаҕа нэһилиэгэ (баһ. А.П. Дьячковскай) саамай кыраҕы харахтаах нэһилиэк буолла, 65 очколанан кыайыылаах аатын ылла. Иккис миэстэҕэ Амма Наахара нэһилиэгэ (баһ. З.С. Александров ) 57 очколанан таҕыста уонна үһүс миэстэни 51 очколаах Амма 1 хамаандата (баһ. М.А. Артемьев) ылла. Соморсун нэһилиэгэ (баһ. А.Ю. Кононов) 42 очколанан төрдүс миэстэҕэ тигистэ. Бары кыттыбыт хамаандалар уопсай түмүгү таһаарыыга быһаарыылаах очукуолары суруммуттара саарбаҕа суох. Манна Бөтүҥ, Болугур, Покровка нэһилиэктэрэ кыттыыны ылбатылар.
Онтон кыттааччылар ортолоругар муҥутуур кыайыылааҕы быһаарыыга Алтан нэһилиэгиттэн Сергей Захаров тахсан биэс киилэ дьааһык арыынан наҕараадаланна.
“Амма олоҕо” хаһыат