Арассыыйа, өрөспүүбүлүкэ төрүт ох саанан ытыыга хс да төгүллээх чемпиона, призера, муҥутуур кыайыылааҕа Егор Баранов кэргэнинээн Любовь Петровналыын аан бастакытын төрүт ох саанан 3Д ытыыга улуустааҕы күрэҕи тэрийдилэр. Күрэх Арҕаа дэриэбинэҕэ анал ытар сиргэ буолан ааста уонна кыттааччылар сэҥээриилэрин ылла.
Күрэххэ Абаҕаттан, Эмистэн уонна Амматтан барыта 19 кыттааччы кытынна. Аан бастакытын үгэс буолбут кус, куобах уонна тииҥ сыаллара буолбакка, 3Д форматтаах араас кыыллар оҕунан ытааччылар сыаллара буоллулар.
“Күрэхтэһиибитин уопуттаах уонна саҥа саҕалааччылар диэн категорияҕа арааран ыыттыбыт. Билигин бу көрүҥ олус сайдан эрэр куоракка, Арассыыйаҕа маннык күрэхтэр куруутун буолаллар. Ону көрөн, Аммаҕа дьону дьарыктаары , күрэхтэри оҥороору, анаан-минээн фигуралары атыыластыбыт. Саҥа көрүҥ буолан дьон билиҥҥитэ улаханнык өйдүү илик. Ол иһин билиһиннэрии курдук бастакы күрэх ыытан, бэркэ ааста дии саныыбыт. Кыттыбыт дьон бары сэҥээрдилэр, астыннылар. Мантан ыла өссө күрэхтэри оҥоруохпут. Элбэх саҥа дьон да, ох саанан дьарыктанааччылар да кэлэн кытыннылар, бэйэлэрин холоннулар. Кэнники уопутурдахтарына өрөспүүбүлүкэҕэ буолар күрэхтэргэ бэлэм буолаллар. Бастакы тэрээһиммитигн өйөөн кэлэн кыттыбыт дьоммутугар махталбытын биллэрэбит”, — диэн тэрийээччи Егор Анатольевич санаатын тириэрдэр.
Түмүккэ уопуттаахтарга эр дьоҥҥо 1 миэстэни Соловьев Альберт, 2 миэстэ Большаков Ариан уонна 3 миэстэ Бубякин Егор, дьахталларга 1 миэстэ Татаринова Ксения, 2 миэстэ Софронова Рая уонна 3 миэстэ Степанова Евгения буоллулар. Саҥа саҕалааччылар ортолоругар эр дьоҥҥо бастакы миэстэни Долгунов Игорь, иккиһи Алексеев Павел уонна үсүһү Харитонов Арсентий, онтон дьахталларга бастакыны Харитонова Мария, иккиһи Охлопкова Марианна, үсүһү Антонова Даяна ыллылар. Маны тэҥэ анал ааттар олохтоннулар. Ол курдук «Бастыҥ саҥа саҕалааччы» — Неустроев Софрон, «Саамай ыраах мишень» — Эверстов Александр, «Биллибэт дистанцияҕа бастыҥ көрдөрүү » — Павлова Вероника. Онтон күрэхтэһии муҥутуур кыайыылааҕынан Надежда Филиппова буолла. Бары кыайыылаахтар мэтээллэринэн уонна грамотанан наҕараадаланнылар. Улууспутугар төрүт ох саанан дьарыктанааччы элбииригэр бу күрэхтэһии төһүү буолара саарбаҕа суох.
“Амма олоҕо” хаһыат