Эмис нэһилиэгэр, норуодунай бэйиэт Күннүк Уурастыырап төрөөбүт Саппыйа алааһыгар тыа сирин түөлбэлэрин икки ардыларыгар ыытыллар комплекснай спартакиада чэрчитинэн төрүт оҕунан ытыыга күрэх буолан ааста. Манна барыта 9 хамаанданан 68 киһи кыттыыны ылан, улууспутугар ох саанан ытыыга интэриэс үөскээбитин көрдөрдө.
“Быйылгы күрэхпитигэр нэһилиэктэртэн кыттыы улаатта. Ол курдук икки нэһилиэк, Сулҕаччы уонна Абаҕа нэһилиэктэрэ бастакытын хамаанда туруоран кытыннылар. Былырыын Соморсун нэһилиэгэр ыытыллыбыта. Онно кыттааччы ахсаана аҕыйах этэ. Онон бу биир сыл иһигэр ох сааҕа интэриэс улааппытын көрөн үөрэбит. Эмис нэһилиэгэ бэркэ көрсөн, тэрийэн ыыппытыгар махтанабыт. Күн-дьыл да туран биэрбитэ үчүгэй. Кыра тыаллаах да буоллар, охчуттар бэркэ ыттылар. Кыттааччылар иккилии эр дьон уонна дьахталлар уонна бэтэрээннэр, уопсайа хамаандаҕа алта киһи буолан күрэхтэстилэр. Ол курдук эр дьон 40 миэтэрэттэн, кэрэ аҥардарбыт 30 миэтэрэттэн куһу, куобаҕы уонна тииҥи ыттылар. Бу күрэхтэһииттэн көрдөххө, бэлэм күүһүрбүт. Саҥа дьону көрдүбүт. Ол үчүгэй”, — диэн этэр күрэхтэһии кылаабынай судьуйата, эдэр туристар станцияларын салайааччыта Николай Николаев.
Дьэ кырдьык да күммүт уота сылааһынан угуттаан күрэхтэһии сарсыарда саҕаланан баран, киэһэ күн киириитэ биирдэ түмүктэннэ. Өссө сүрүн күрэхтэһии бүппүтүн кэннэ “Эмис нэһилиэгэ” тыа сирин түөлбэтин дьаһалтата бэйэтин анал харчынан бирииһин туруоран ким баҕалаах хамаанда бириистээх миэстэлэр иһин кииристилэр.
Манна кыайыылааҕынан Амма Наахара нэһилиэгэ таҕыста уонна 8000 солк сертификатынан наҕараадаланна. Онтон иккис миэстэни ылбыт Амма нэһилиэгэ 6000 солк, үһүс миэстэҕэ тахсыбыт Соморсун хамаандата 4000 солк сертификаты туттулар. Дьэ онтон биирдиилээн киирсиилэри көрдөххө, эр дьон бэтэрээннэргэ бастакы миэстэ Бубякин Дмитрий (Амма) 2 миэстэ Баранов Федор (Соморсун), 3 миэстэ Нестеров Василий (Соморсун), бэтэрээн дьахталларга 1 миэстэ Федорова Василина (Амма) 2 миэстэ Баранова Любовь (Амма) 3 миэстэ Неустроева Мария (Эмис), эр дьон ортолоругар 1 миэстэ Соловьев Альберт (Эмис), 2 миэстэ Большаков Ариан (Амма) 3 миэстэ Степанов Михаил (Соморсун), 1 миэстэ Протопопов Михаил (Соморсун), 2 миэстэ Александров Гаврил (Амма Наахара) 3 миэстэ Алексеев Николай (Чакыр), дьахталларга 1 миэстэ Александрова Людмила (Амма Наахара), 2 миэстэ Филиппова Надежда (Амма), 3 миэстэ Степанова Ариадна (Соморсун), 1 миэстэ Заборовская Маша (Амма Наахара), 2 миэстэ Татаринова Ксения (Абаҕа), Софронова Раиса (Амма) буоллулар. Онтон уопсай комплекснай спартакиадаҕа тахсар түмүгүнэн бары очколары ааҕан 14 очколаах Амма нэһилиэгэ бастаата. Соморсун нэһилиэгэ 21 очколанан иккис миэстэҕэ уонна 23 очколаах Амма Наахара нэһилиэгэ үһүс миэстэҕэ тахсаннар бэйэлэрин түөлбэлэригэр наадалаах бааллары ыллылар.
Олохтоох Эмис нэһилиэгэ икки эрэ очконан хаалан төрдүс миэстэ буолла. Эмистэр улуустааҕы күрэхтэһиини үрдүк таһымҥа ыыппыттарын бэлиэтиир наада. Нэһилиэк дьаһалтата чемпионнар ортолоругар бэйэтин анал бирииһин оонньотто. Онно баата тайанан, олохтоох Альберт Соловьев тардан ылан мончуук кэмпилиэгин хаһаайына буолла.
Спорт инструктор Нонна Ноговицына улуус таһымнаах күрэхтэһиини тэрийиигэ кыһамньылаах сыһыана көстөн, барыта уурбут -туппут курдук барда. Кыттааччылары сылаас аһынан олохтоох Светлана Куприянова хааччыйда, сцена бэтэрээнэ Софья Соловьева ылбаҕай ырыатын бэлэхтээтэ. Онон күн саҕахха саһыыта, салгын сөрүүдүйүүтэ күрэхтэһээччилэр бары астынан, үөрэн-көтөн дьиэлэригэр айаннаатылар.
“Амма олоҕо” хаһыат