Ат үрдүттэн оҕунан ытыы өрөспүүбүлүкэбитигэр саҥа сайдан эрэр, “эдэр” спорт көрүҥэ буолар. Онуоха бастакы олук Аммаҕа былырыын ыытыллыбыт Олоҥхо ыһыаҕар ууруллубута диэххэ сөп: күрэхтэһии биир көрүҥүнэн киирэн элбэх киһини дьарыктанарга көҕүлээбитэ. Онтон бу күннэргэ Саха сирин хамаандата Монголияҕа ыытылла турар Азия чемпионатыгар аан бастакытын кытта сылдьар.
Бу чемпионакка Амма Наахара ыччата, охчут Гаврил Александров кыттан сүүмэрдэммит хамаанда копилкатыгар бастакы мэтээли аҕалла. Монголия истиэбигэр ыытыллар улахан күрэх биир дойдулаахпытыгар боруонса мэтээли түстээтэ. Саҥа саҕалыыр спортсмен диэтэххэ улахан ситиһии. Онон Амма дьоно-сэргэтэ эрэ буолбакка, бүтүн Саха сирэ Гаврил ситиһиитинэн киэн туттабыт. Кытаат, саҥа кыайыыларга эрэллээхтик хардыылаа диибит.
“Амма олоҕо” хаһыат.