Улуус баһылыга Степан Кузьмин Амма нэһилиэгэр тутулла турар икки эбийиэккэ сылдьан үлэһиттэри кытта көрсөн тутуу хаамыытын билистэ.
Амма нэһилиэгэр быйыл сыл бүтүөр диэри икки эбийиэк тутуута түмүктэнэрэ былааннанар. Ол курдук ааспыт сылга үлэҕэ киириэхтээх Молодежнай уулусса 7 нүөмэригэр элбэх кыбартыыралаах дьиэ уонна соторутааҕыта тутуута саҕаламмыт Амматааҕы кадр киинин саҥа дьиэтэ. Улуус баһылыга Степан Кузьмин уонна муниципальнай сакаас сулууспатын салайааччыта Николай Новиков икки эбийиэккэ сылдьан тутуу хаамыытын билсэн, бэдэрээччиттэри кытта көрүстүлэр, тутуу болдьоҕо тутуһуллуутун көрдүлэр. Амматааҕы кадр киинэ региональнай бырайыак чэрчитинэн тутуута саҕаланна. Бырайыак Дойду Бэрэсидьиэнэ Владимир Путин көҕүлээбит «Кадры» национальнай бырайыагын «Управление рынком труда» федеральнай бырайыагы олоххо киллэрии биир хайысхата буолар. Эбийиэк судаарыстыбаннай сакаасчытынан өрөспүүбүлүкэ Дьарыктаах киинэ буолар. Тутууну Семен Черноградскай салайааччылаах «Сахастроймонтаж» ХЭТ ыыта сылдьар. Тутуу уопсай суумата 25 462 963, 78 солкуобай. Түргэн конструкциянан тутуллан балаҕан ыйын 15 күнүгэр бүтүөхтээх. Күн бүгүн эбийиэккэ 7 үлэһит уонна прораб үлэлии сылдьаллар.
Иккис көрбүт эбийиэгинэн гражданнары хаарбах дьиэттэн көһөрүү бырагырааматынан тутулла турар, бары киирэр болдьоҕо ааспыт элбэх кыбартыыралаах биэс этээстээх дьиэ буолла. Биллэрин курдук манна сакаасчыт СӨ олорор дьиэлэри тутууга дирекцията. Бэдэрээччит «Экострой» ХЭТ. Билигин манна 18 үлэһит үлэлии сылдьар.
«Бу икки эбийиэк улууспутугар суолталаахтар. Биллэрин курдук дьиэ тутуута кэтэһиллибитэ ыраатта. Бэдэрээччит ылсан үлэлии сылдьар, ахсынньы ыйга көҥдөйүн бүтэрэргэ соруктаах. Кадр киинэ тутуллуннаҕына үлэ көрдөөччүлэргэ оҥоһуллар өҥө саҥа таһымҥа тахсан бары аныгы ирдэбиллэргэ эппиэттиир буолуохтаах. Икки эбийиэккэ тутуу бара турар. Тутааччыларга болдьоҕу тутуһалларыгар, хаачыстыбаны көрөллөрүгэр эттим. Төһө да уустук кэмнэр турдаллар, тутуу барар. Маны биһиги бэйэбит хонтуруолбутугар тутабыт»,- диэн этэр Степан Николаевич.
Биһиги эрэдээксийэбит тутуулар хаамыыларын сырдата туруо. Сурутун, ааҕын, биһигинниин буолун.
«Амма олоҕо» хаһыат
Хаартыскалар: Августина Иванова