Муус устар 21 күнүттэн саҕалаан “Куорат тупсаҕай эйгэтин оҥоруу” диэн национальнай бырайыак иһинэн баар “Олох инфраструктурата” федеральнай бырайыакка Бүтүн Арассыыйатааҕы куоластааһын бара турар. Бу бырайыак көмөтүнэн улуустарга киһи кэрэхсиир көрөр тутуулара, сынньанар сирдэрэ баар буоллулар. Куоластааһыҥҥа 35 муниципальнай тэриллиилэртэн 81 бырайыак киирэн, билигин дьон-сэргэ ханнык бырайыактары талалларыгар бэйэлэрин куоластарын биэрэ сылдьаллар. Куоластааһын хайдах барарыттан хас биирдии бырайыак олоххо киирэр дьылҕата быһаарыллар. Амма улууһун баһылыгын тутууга солбуйааччыта Виктор Смирников Амма улууһун олохтоохторо, атын да сиргэ олорор биир дойдулаахтарбыт бырайыактарга куоластарын биэрэн, Аммабыт тупсаҕай көстүүлээх сирдэнэригэр күүс-көмө буолуохтара диэн эрэлин биллэрэр. Маннык түгэни мүччү тутар табыллыбат.
“Ааспыт сылга бу бырайыак көмөтүнэн “Тэтим” мини-парка үлэҕэ киирээри оҥоһулла сылдьар. Ол курдук бу бырайыак кыайыылаах тахсан 50 мөл. солк федеральнай үбүлээһини ылбыта. Оннук курдук бу бырагырааманан ити билигин оҕо-аймах сөбүлээн сылдьар “Строитель” мини-парка үлэҕэ киирбитэ. Уопсайынан бу бырагыраама икки көрүҥнээх. Биирэ өрөспүүбүлүкэ иһинэн туспа куоластааһыннаах, биирэ Уһук Илин федеральнай уокурук иһинэн. Онно икки суоллаах. Ол курдук 50 мөл солк диэри уонна 100 мөл. солкуобай. Бу улахан суумаҕа 10 тыһыынча нэһилиэнньэлээх пууннар кытталлар. Билэргит курдук ааспыт сыл сайын манна Амма улууһугар Саха өрөспүүбүлүкэтин Архитектураҕа управлениета кэлэн семинар ыытан барбыта. Онно кинилэргэ биһиги история уонна кыраайы үөрэтэр түмэлбит территориятын көрдөрбүппүт, тупсарыахпытын баҕарарбытын эппиппит. Биллэн туран манна улуус бюджетэ хайдах да тиийбэт. Ыалдьыттарбыт култуурунай нэһилиэстибэҕэ киирэр эбийиэктэр баалларын көрөн олус сөхпүттэрэ уонна кырдьык да дьон-сэргэ кэлэн көрөрүгэр, сылдьарыгар усулуобуйа суоҕун, тупсарыллыан наадатын дьиҥ харахтарынан көрөн итэҕэйбиттэрэ, онон бу федеральнай бырагыраамаҕа кыттарга сүбэлээбиттэрэ. Онон Амма нэһилиэгэ төһө да 10 000 нэһилиэнньэтэ суоҕун иһин, бу бырагырааматтан 100 000 мөл. солкуобайы ылар чааһыгар киирсиэххэ сөп диэн буолбута. Онон дьэ ааспыт сылтан биһиги бу өртүгэр үлэлэһэн барбыппыт. Бырайыакпыт ураты буоллун диэн анал дизайнер булбуппут. Бу бэйэтэ туспа көрүүлээх, Нам улууһугар архитекторынан үлэлээн баран, билигин өрөспүүбүлүкэҕэ киирэн биир бастыҥ, туспа көрүүлээх бырайыактааччы быһыытынан биллэр Анна-Мария Попова буолар. Кини бу күннэргэ дизайн- бырайыагы оҥорон көрдөрүөхтээх. Ол бигэргэннэ да, билигин куоластааһыҥҥа бырайыакпытын угуохпут, билиһиннэриэхпит. Манна биһиги аҥардас түмэл эрэ территориятын буолбакка, суол нөҥүө баар территорияны эмиэ киллэриэхпитин баҕарабыт. Өйдүүргүт буолуо, бу сиргэ хаһан эрэ кириэс туран, церковь оҥоһуллуохтаах этэ. Итинник ыһыллан-тоҕуллан туруо дуо. Онон манна эмиэ дьон кэлэн сылдьар уопсастыбаннай сирин оҥоруохпутун баҕарабыт. Билигин куоластааһын бастакы этаба буола турар. Бу куоластааһыҥҥа Дойдубут Бэрэсидьиэнэ Владимир Путин муус устар ый 21 күнүгэр старт биэрбитэ. Онон Арассыыйа үрдүнэн кыра, улахан нэһилиэктэр бары бэйэлэрин бырайыактарын олоххо киллэрээри куоластыы сылдьаллар. Манна улахан федеральнай хамыыһыйа тэриллэн баал туруоруллуохтаах. Төһөнөн элбэх куолаһы ылаҕын да, соччонон, баалын улахан буолан, үбүлээһини ыларгар, бырагыраамаҕа киирэргэр кыах үөскүүр. Өскөтүн сөптөөх куолаһы хомуйан, баал ыллахпытына, салгыы тутар-бырайыактыыр документациятын оҥороммут, экспертизаны аһардыахтаахпыт. Билигин сүрүн сыал – хайаатар да кырата 3000 куолаһы хомуйуохпутун наада. Онон хас биирдии 14 сааһын туолбут Амма улууһун олохтооҕо, атын да сирдэргэ олорор биир дойдулаахтарбыт бырайыакпытын өйүөхтэрэ диэн эрэнэбин. Куоластааһын олус уустуга суох. Манна улууспутугар хас биирдии эйгэттэн эппиэттээх дьоннор киирэн анал хамыыһыйа тэриллибитэ, тустаах эппиэтинэстээх дьон анаммыттара. Онон улууспутугар илин өртүттэн киирэр аартыкка кэрэхсэбиллээх, дьон-сэргэ сөбүлээн сылдьар сирэ баар буоларыгар бука бары кыттыһыаҕын диэн ыҥырабын. Бэйэҕитигэр 1-2 мүнүүтэ булан, улуускутугар тупсаҕай көстүүлээх, киэһэтин баран сынньанар, күүлэйдиир сир баар буоларыгар куоластыаххыт диэн эрэнэбит”, — диэн Виктор Владимирович санаатын үллэстэн, куоластыырга ыҥырар.
Күндү Амма улууһун бары олохтоохторо, ыраах-чугас олорор биир дойдулаахтарбыт, бука диэн куоластааһын бу ссылкатынан http://zagorodsreda.gosuslugi.ru киирэн, куоласкытын биэрэн, бэйэҕит кылааккытын киллэрин. Онтон сатаабат буоллаххытына, эһиэхэ көмөҕө волонтердар кэлиэхтэрэ.
“Амма олоҕо” хаһыат