Амурскай уобалас Белогорск куоратыгар эдэр тустууктарга уобалас ССРС спордун маастара Расим Юлдашев сырдык аатыгар аһаҕас турнир ыытылынна. Манна Амма улууһуттан 21 эдэр тустуук кыттыыны ылан ситиһиилээхтик кытыннылар.
«Спортивнай оскуолабыт иитиллээччилэрэ Благовещенскай куоракка баран эрчиллиини баран Белогорск куоракка үһүс күрэхтэһиилэрэ буолла. Онтон Соморсун филиалын иитиллээччилэрэ тренердэрэ Петр Васильевы кытта Белогорскай түһүлгэтигэр дойдуларыттан айаннаан кэллилэр уонна бэрт ситиһиилээхтик кытыннылар.
Ол курдук күрэх бастакы күнүгэр 2015-2016 сыл төрүөх уолаттарга 22 киилэҕэ Соморсунтан Роббек Дьулусхан үһүс миэстэ буолла, боруонса призер буолла. 28 киилэҕэ Амматтан Винокуров Эрхаан чемпион үрдүк аатын ылла. Иккис күҥҥэ Соморсунтан бырааттыы Айхал уонна Виктор Ефимовтар бэртээхэй тустууну көрдөрдүлэр. Ол курдук 2017-2018 сыл төрүөх уолаттарга 20 киилэҕэ Айхал үһүс миэстэ, 30 киилэҕэ Виктор иккис миэстэ буоллулар.
Уопсайынан бу Амурскай уобаласка ыытыллыбыт аһаҕас турнирдарга эдэр тустууктарбыт ситиһиилээхтик кытыннылар, элбэҕи биллилэр-көрдүлэр. Онон түгэнинэн туһанан Амматааҕы спортивнай оскуола кэлэктиибигэр, төрөппүттэрбитигэр улахан махталбытын тириэрдэбит. Маннык барыы-кэлии, күрэхтэһиилэргэ кыттыы оҕолорго сайдыыны аҕалар. Онон төһөнөн элбэхтэ атын сиргэ баран күрэхтэһиилэргэ кыттар да, оҕо оччонон сайдан, уопутуран иһэр. Инникитин бу маннык эрчиллиилэр, күрэхтэһиилэргэ кыттыы улууспутугар көҥүл тустуу сайдыытыгар олук буолуо диэн эрэллээхпин», — диэн Амматааҕы Н.С. Захаров-Сахаачча аатынан спортивнай оскуолатын сүрүн тренерэ Сырдык Айылгын Бойуот уола санаатын үллэһиннэ.
«Амма олоҕо» хаһыат