Муус устар 1 күнүгэр РФ үтүөлээх, СӨ норуодунай артыыската, М.И. Глинка аатынан норуоттар икки ардыларынааҕы вокалистар күрэхтэрин лауреата, П.А. Ойуунускай аатынан СӨ Судаарыстыбаннай бириэмийэтин лауреата, биир дойдулаахпыт Нина Чигирева күн сириттэн барбыта биир сыла буолла. Үтүөкэннээх, талааннаах артыысканы бу күн дойдутугар Эмискэ олус истиҥник ахтан -санаан аастылар.
Е.А. Захарова аатынан Эмистээҕи култуура киинигэр истиҥ кэргэни, ийэни, эбэни, эдьиийи, доҕору, наставнигы, Сахатын сирин эрэ буолбакка, Арассыыйаны киэҥ сиргэ аатырдыбыт, айылҕаттан бэриллибит күүстээх куоластаах, талааннаах артыысканы иһирэх тылынан ахта-саныы Дьокуускайтан чугас дьоно кэллилэр. Ол курдук кэргэнэ, СӨ искусствотын үтүөлээх деятелэ, РФ култууратын үтүөлээх үлэһитэ Сергей Чигирев, Арассыыйа уонна СӨ үтүөлээх артыыската Анна Дьячковская, СӨ култууратын үтүөлээх үлэһитэ Раиса Крылова, СӨ норуодунай артыыһа Александр Бурнашев, “Саха” НКИК суруналыыһа, Саха телевидениетын туйгуна Георгий Белоусов, Нина Николаевна бииргэ төрөөбүт балтылара Зоя Слепцова, Ольга Игнатьева, Амма улууһун бэтэрээннэрин Сэбиэтин бэрэссэдээтэлэ Мария Захарова уонна Эмис нэһилиэгин олохтоохторо санааларын сайа эттилэр.
“Биһиги Эмиспит киэн туттар киһитэ Нина Николаевна Чигирева бу орто дойдуттан барбыта муус устар 1 күнүгэр биир сылын туолла. Онно анаан кулууппутугар кини олоҕуттан кэпсиир кыра быыстапканы туруордубут. Дьокуускайга анаан киирэ сылдьан, кэргэнэ Сергей Валентиновичтан Нина Николаевна араас кэнсиэртэргэ, күрэхтэргэ кэтэ сылдьыбыт биэс былааччыйатын уларсыбытым. Онтон биирин Эмискэ туруорбуппут.
Онтон атыннарын бүгүн Дьокуускайга буолар Эмис күннэригэр быыстапкаҕа туруордубут. Бэҕэһээ ахтыы күнүгэр кинини кытта чугастык алтыспыт дьонноро кэлэн наһаа үчүгэй тыллары этэн бардылар. Ол курдук холобура кэргэнэ Сергей Валентинович уолунаан Дмитрийдиин, икки сиэнин кытта кэлэн Нина Николаевналыын хайдах холбоспуттарын, хайдах курдук кини эйэҕэс эбэ, кэргэн, бастыҥ хаһаайка буоларын сылаастык аҕынна, кини сүдү талааныгар сүгүрүйэрин биллэрдэ уонна “Нина наша Великая” диэн ааттыыр. Өрөспүүбүлүкэ норуодунай артыыһа Александр Валерьевич Бурнашов эдьиийдэрбинээн Марина Поповалыын, Нина Чигиревалыын, Анна Дьячковскаялыын, Раиса Захаровалыын, Анастасия Варламовалыын бииргэ тэҥҥэ сылдьан, ыллаан элбэххэ үөрэппиттэрэ диэн махталын биллэрдэ уонна бэйэтин дьоллооҕунан ааҕынабын диэн этэр. Нина Николаевна олус боростуой, элбэхтик сүбэлиирэ, ол сүбэтэ киниэхэ айар үлэтигэр куруутун суолдьут сулус буолар, саамай үрдүкү улахан сыаналарга ыллаан, дойдутун, таптыыр Амматын, Сахабыт сирин , Арассыыйаны аан дойдуга, тас дойдуларга тиийэн аатырдыбыт, сөҕүмэр талаанынан көрөөччүлэри сөхтөрбүт, музыка үрдүкү маастарыстыбатын көрдөрбүт бастыҥ киһибит диэн эттэ. Анна Васильевна Дьячковская Нина Николаевналыын элбэхтэ омук сирдэригэр сылдьыбыттарын, кэнсиэртээбиттэрин, конкурстарга кыттыбыттарын кэпсээн туран, чахчы кини сүдү талаан буоларын, ол талаанынан үгүс элбэх дьону сөхтөрбүтүн, билигин кинини тыйаатыр барыта суохтуурун, ахтарын этэр.
Раиса Крылова бэйэтин ахтыытыгар Нина Николаевнаны олус суохтуурун, «аккардеоммун, баяммын ыллым да, Нинабын өрүүтүн саныыбын», араас балаһыанньаҕа, кыһыҥҥы тымныыларга , сайыҥҥы куйааска айаны тулуйан гастролларга сылдьыбыттарын, саҥарбакка да өйдөһөллөрүн эттэ. Онтон суруналыыс Георгий Белоусов тыйаатырга үлэлии сылдьыбыт кэмнэрин сылаастык, махтал тылларын ахтан туран, Саха Күөрэгэйэ 95 сааһыгар уһуллубут биэриини өссө хатылаабыт киһи диэн эттэ. Тоҕо диэтэр онно Нина Николаевна кэлэн наһаа үчүгэйдик кэпсээбитин, бэйэтин уһулаары хаста ыҥыра сылдьыбытын олох кэлин диэн кыайан кэлбэтэҕин эттэ. Кинини “Мичилкэ” диэн ыҥырар эбит. Онтон чугас дьоно балтылара, эдьиийдэрэ тулаайах хаалбыттарын кэннэ кинилэри көрөн-истэн улаатыннарбытын, куруутун кинилэр тустарыгар кыһанарын, барыларын бииргэ тутан сомоҕолуурун сылаастык аҕыннылар. Маны сэргэ Эмис ытык олохтооҕо, Нина Николаевнаны үөрэтэ сылдьыбыт учуутала Прасковья Семеновна Неустроева эмиэ үчүгэй баҕайытык Нина Николаевна туһунан кэпсээтэ. Өр сылларга Эмис нэһилиэгин салайбыт, билигин улуус бэтэрээннэрин Сэбиэтин бэрэссэдээтэлэ Мария Романовна Захарова Нина Николаевна дойдута ыытар бары тэрээһиннэригэр куруутун кыттара, өйүүрэ, Екатерина Захарова аатын үйэтиигэ үлэлэспитин махтана аҕынна. Бу кэлэ сылдьан уҥуоҕар Тэгэрээттэҕэ тахса сырыттылар. Сергей Валентинович бюст оҥорторон манна дойдутугар уонна үлэлээбит тыйаатырыгар туруоруон баҕарар, онно үлэлэһэ сылдьар», — диэн Е.А. Захарова аатынан Эмистээҕи култуура киинин дириэктэрэ Анжелика Иванова ахтыы күнүн туһунан билиһиннэрдэ.
Ааспыт сылт ыам ыйын 19 күнүгэр «Удачнай» трубкаттан булуллубут 63 караттаах алмааска Нина Чигирева аата иҥэриллибитэ. Алмаас таас курдук чаҕылхай талааннаах биир дойдулаахпыт аата үйэлэргэ ааттана туруо.
“Амма олоҕо” хаһыат