Барҕа баайым,
Өлбөт мэңэм –
Мин дьолум…
Кустук өңнөөх,
Кымыс сыттаах,
Сахам аптаах саңата…
Улуу киhибит Сэмэн Данилов эппит хомоҕой тыллара, төрөөбүт төрүт тылбыт хайдахтаах курдук кэрэтин, мындырын, хас биирдии киhиэхэ күндүттэн күндү буоларын өйдөтөр.
Олунньу уон үhэ – Ийэ тыл уонна сурук-бичик кʏнэ. «Колосок» уhуйааңңа, Болугур нэhилиэгин олохтоох библиотеката уонна уhуйаан төрөппүттэрэ кырачаанннарга анаан төрөөбүт тылга тапталы иңэрэн, төрʏт дорҕооннору чиңэтэн, иилээн-саҕалаан, биир улахан суолталаах күммүтʏн, көрдөөхтүк тэрийэн ыыттылар. Оҕолорбут күн-күбэй ийэлэрэ төрүт дорҕооннор буоланнар, ырыа-хоhоон этэннэр, таабырын таайтаран, оонньотон умнуллубат түгэни бэлэхтээн үөртʏлэр. Ону тэңэ «Ньургуhун» бэлэмнэнии бөлөх иитиллээччилэрэ өбʏгэ үнүстрүмүөнэ доҕуhуоллаах «Саадьаҕай оҕус» норуот ырыатын ыллаан, оҕолорго, ыалдьыттарга бэлэх ууннулар. Түмʏккэ кыралыын-улаханныын туора турбакка үгэс быhыытынан «Оhуор үңкүүтүн» оройуттан туттубут, ыалдьыттары кытары бэлиэ түгэни хаартыскаҕа хааллардыбыт. Уhуйаанныын ыкса үлэлэhэр олохтоох библиотекабыт үлэhиттэригэр Марианна Иннокентьевнаҕа, Наталья Николаевнаҕа барҕа махталбытын тиэрдэбит. Көхтөөх төрөппүттэрбитигэр мунура суох махтанабыт. Маны таhынан Айыына Кожурова куйаар ситимигэр биллэрбит «hөҕʏң» диэн ыңырыытыгар, төрөппүттэрбит өбүгэ үгэhин билиhиннэриигэ оңорбут оонньуурдарын көрдөрөн кыттыыны ыллыбыт.
Ольга Петрова.