Айылҕаттан айдарыылаах, Аммабыт ытык киһитэ Матрена Григорьева – Чугдаара Хотун улууһун хаһыатын өйүүрүн туһунан биллэрдэ уонна бар дьонун ыҥырда. Санатан эттэхпитинэ, “Амма олоҕо” хаһыаппытыгар биир сылга толору суруттаххына, кэлэр сыл тохсунньутугар бастакы нүөмэргин кытта Чугдаара Хотун үүнэр сылга алгыстаах халандаарын тутуоххут.
“Күндү биир дойдулаахтарым! Улууспут соҕотох “Амма олоҕо” хаһыатыгар билигин чэпчэтиилээх сурутуу бара турар. Хас биирдии улуус ыала бэйэтин дьиэтигэр бу табыгастаах кэми аһарбакка суруттарын диэн ыҥырабын. Хаһыаты бэйэтин тутан олорон дьиҥ улууспут тыынын илдьэ сылдьар сонуннары, аһаҕас кэпсэтиилэри, сүбэ сүмэтин ааҕа олорор ордук буоллаҕа. Сибээс ситимэ бутуурун ылына олоруохтааҕар, дьиҥ биир баар суох хаһыаппытын оҕолорго , ытык саастаахтарбытыгар анаан суруйтарыаҕын. Улууспут хаһыатын үлэтин өйүөҕүн, саамай эрэллээх сурутааччы буолуоҕун, ыччаттарбытыгар улуустарын “Амма олоҕо” хаһыатын ааҕалларын ирдиэҕин. Аммаларын сонуннарын ааҕа турдуннар диэн Алтаным түөлбэтин түөрт ытык саастаах дьонугар суруйтардым. Ыччат дьонум эмиэ Ийэ, Аҕа, Эбээ, Эһээ дьонҥутугар Саҥа дьылга бэлэх оҥорун”, — диэн Чугдаара Хотун санаатын этэн ыытта.
Биһиги үтүө мааны киһибитигэр ис сүрэхтэн махтал тылларын тириэрдэбит уонна улууспут дьоно Чугдаара Хотун ыҥырыытын ылынан соҕотох хаһыаттарыгар сурутуохтара диэн эрэнэбит.
“Амма олоҕо” хаһыат