Амма улууһун спордун бэтэрээнэ, өрөспүүбүлүкэ сүүрүүгэ хас да төгүллээх чөмпүйүөнкэтэ Дария Федорова ыраах Белоруссия өрөспүүбүлүкэтигэр бэтэрээннэр күрэхтэригэр үс дистанцияҕа бастаата.
“Бүгүн үөрүүлээх сонуну туттубут. Ол курдук биһиги биир көхтөөх бэтэрээммит, спортка улахан ситиһиилэрдээх Дария Владимировна Федорова Минскэй куоракка тиийэн бэтэрээннэр ортолоругар чаҕылхай ситиһиилэннэ. Кини 400 м, 1000 м уонна 10 км сүүрэн бары дистанцияларга биэтэккэ бастакынан кэллэ. Онон Дария Владимировнаны бу ситиһиитинэн истиҥник эҕэрдэлиибит. Кыайыы 80 сыллаах үбүлүөйүгэр дьоһун кыайыы буолла”, — диэн Амма улууһун бэтэрээннэрин Сэбиэтин бэрэссэдээтэлэ Мария Захарова сырдатта.
“Амма олоҕо” хаһыат