Аммаҕа айар-тутар талааннаах дьон үгүстэр. Кинилэр тугу сатыылларын үллэстэн, маастар-кылаастары ыытан үгүс киһи сылдьан дуоһуйууну ылан барар. “Киһи талаана хайа баҕарар сааһыгар аһыллар, ону таба өйдүөххэ, бириэмэ кэлбитин билиэххэ эрэ наада” диэн этэр Ис дьыала салаатын бэтэрээнэ Анна Килбясова – Айылҕаана Оһуордаах.
Анна быйылгы сылтан бэйэ дьарыктаах статуһун ылан, Амматааҕы “Биисинэс –инкубатор” резиденэ буолан, хос ылынан күннэтэ дьон кэлэринэн маастар –кылаастары ыытар. Ол инниттэн да араас сирдэргэ наймылаһан үгүс дьон киниэхэ сылдьан гипсэттэн оҥоһуктары кырааскалаан, уруһуйдаан да кэрэ бэлэхтэри бэйэлэригэр, чугас дьонноругар оҥорбуттара. Анна элбэх, аҕыйах киһи диэн араарбакка, бэл соҕотох да буоллаххына маастар-кылааһын ыытар, нэһилиэктэргэ эмиэ тахсар. Бөтүҥҥэ баар медисиинискэй-социальнай чэбдигирдэр кииҥҥэ сынньанааччыларга эмиэ күүтүүлээх ыалдьыт. Кини бу күннэргэ аатырбыт худуоһунньук Семен Луканси ыытар уруһуйга сайыҥҥы оскуолатыгар сырытта, киистэ алыбар уһуйулунна.
“Мин бэйэм дьиҥэ ханнык да уруһуйдуур, оҥорор үөрэҕи бүтэрбэтэҕим буоллаҕа. Өр сыл ис дьыала салаатыгар үлэлээн сынньалаҥҥа тахсан баран хайдах эрэ уруһуйдуур баҕам кэлэн, бэйэм да билбэппинэн уруһуй алыбар ылларбытым. Бу дьарыкпын билигин сүрүн дьарык оҥостон үлэлии, айа-тута сылдьабын. Хас биирдии киһи талааннаах дии саныыбын. Биир дойдулаахпыт Семен Луканси маннык уруһуй уруоктарын ыыппыта уонча сыл буолбут эбит. Мин киниэхэ киирэн быйыл үс күн устата сарсыарда уон чаастан киэһэ уон чааска диэри дьарыктанным. Кини иккилии чаас устата үс нэдиэлэни быһа дьарыктыыр эбит. Бу үс күн устата киниттэн элбэҕи биллим, өҥнөрү дьүөрэлииргэ, буккуйан араас өҥү таһаарары сэҥээрдим. Сүрүннээн мэтириэттэри оҥорорго холоннум. Кэргэним ийэтэ, биллэр ыанньыксыт, Дьоруой ийэ, эбээбитин Аграфена Егоровна Сутакова мэтириэтин оҥордум. Семен бэйэтэ наһаа боростуой, кэпсэтинньэҥ. Элбэҕи сүбэлиир, тута тугу сыыспыккын этэр, көннөттөрөр. Быһатын бэрт ирдэбиллээх учуутал диэххэ. Онон элбэххэ үөрэнэн киниэхэ махталым муҥура суох уонна айар үлэтигэр өссө үрдүк ситиһиилэри, бииртэн биир хатыламмат кэрэ үлэлэри таһаара турарыгар баҕарабын. Бэйэм салгыы гипсэнэн дьарыкпын сайыннаран, өссө араас оҥоһуктары оҥорор, өссө эбии туойунан бэйэм иһит оҥорон таһаарар баҕалаахпын. Онно анаан бэлэмнэнии үлэтэ бара турар. Маастар-кылаастарбар дьон сылдьан үөрэн-көтөн, махтанан барара наһаа үчүгэй, дьоҥҥо маннык үөрүүнү бэлэхтии туруохпун баҕарабын”, — диэн этэр айар куттаах Анна Килбясова.
Талааннаах биир дойдулаахпыт туһунан өссө сырдатыахпыт, кэпсиэхпит.
“Амма олоҕо” хаһыат