Новосибирскай куоракка ыытыллыбыт Аан дойдутааҕы «Кубок Дружбы U14» волейбол күрэҕэр Амма №1 дээх орто оскуолатыттан Елена Константинова секциятыгар дьарыктыыр үөрэнээччилэринээн ситиһиилээхтик кыттан кэллилэр.
Улахан күрэххэ 14 саастарыгар диэри волейбол доҕордоох, спорду өрө туппут уолаттарбыт 6-с кылаастан Артур Никифоров, Арсен Федоров, Рустам Еремеев, Лёня Сосин, Дамир Стручков, Арслан Никитин, Алгыс Баттахов уонна 7 кылаастан Артём Илларионов, Айхал Михеев кытыннылар. Барыта 16 хамаанда кытынна. Амматтан ураты бары спортивнай оскуола, олимпийскай резервалар хамаандалара күрэхтэстилэр. Биһиги оҕолорбут үчүгэйдик оонньоон инники эрэллээхтэрин, оонньуур кыахтаахтарын көрдөрдүлэр. Уопсай түмүгүнэн Артём Илларионов «Бастыҥ оонньооччу» анал аат хаһаайына буолан хамаанда күүстээх оонньооччулааҕын көрдөрдө.
Уопсай түмүккэ Новосибирскай куорат Олимпийскай резерва волейболистара кыайыылаах таҕыстылар. Иккис миэстэҕэ Санкт-Петербург Калининскай оройуонун Олимпийскай резерва волейболистара, үһүскэ Монголияттан «Бэрх» волейбол кулуубун үөрэнээччилэрэ буоллулар. Биһиги Амма улууһун инникигэ эрэллэрэ Саха сириттэн аан бастаан маннык күрэххэ кыттан, биэс күүстээх хамаанданы кэннилэригэр хаалларан 11-с миэстэни кыбынан кэллилэр. Күрэҕи тэрийээччи спортсмен оҕолору босхо аһатан, хоннорон улахан күүс-көмө буоллулар. Тренер Елена Николаевна оскуола дириэктэригэр Юрий Егорович Шишигиҥҥа, харчынан көмөлөспүт Амма улууһун дьонноругар, бары төрөппүттэр оҕолорун инникитин өйдөөн ыыппыттарыгар махталын тириэрдэр. Хамаандаҕа эрдэ спортивнай таҥастарын өрүү көмө оҥорор Станислав Терентьев оҥотторбута. Бу күрэххэ тэрийээччилэр бэйэлэрэ спортивнай көстүүмнэри кытары хас биирдиилэригэр рюкзак бэлэх ууммуттара хамаанданы улахан күрэххэ кыттарга өрө көтөхтө, доҕордуу сомоҕолоон биир тыыннаата.
«Дьарыктыыр оҕолорум ситиһиилэриттэн олус үөрэбин, оҕолорбунан киэн туттабын. Үөрэххэ, спортка, тус бэйэлэригэр үрдүктэн үрдүк ситиһиилэр баҕарабын. Үлэ түмүгэ өссө да кэлиэ, көстүө дии саныыбын» — диэн Елена Константинова санаатын үллэстэр.
Амманы ааттатар эдэр волейболистарбытыгар улуускутун өссө да волейбол күрэхтэригэр ааттата турун диибит. Спорт чыпчаалыгар тахсарга инникигэ ситиһиилэр кэлэ турдуннар. Чөл олохтоох, кытаанах доруобуйалаах, үчүгэй үөрэхтээх дьон буолун. Барыга бэрээдэктиир олоххут аргыһа спорт буоллун. Улуу Кыайыыны аҕалбыт хос эһэлэргит, чугас дьоҥҥут кыайыылара эһигини олоххо кыайыыга эрэ сирдээтин диэн баҕа санаа бастыҥын этэбит
Ирина КОРЯКИНА-ОЛЕСОВА, уопс. кэрэспэдьиэн