Өнньүөс нэһилиэгэр Үлэ Геройа Петр Ионович Яковлев төрөөбүтэ 105 сылыгар ананан ыытыллыбыт «Уруйдан Үлэ киһитэ» ыһыахха икки күн устата үгүс дьон тоҕуоруһа мустан, үрдүк таһымҥа буолан ааста. Бу бэлиэ түгэнинэн Петр Ионович бииргэ үлэлээбит дьонун, үөлээннээхтэрин элбэхтэ ахтан-санаан аастылар.
Аҕа дойду Улуу сэриитин кыттыылааҕа, биһиги аҕабыт, эһэбит, хос эһэбит Михаил Гаврильевич Ефремов быйыл төрөөбүтэ 100 сылын туолла. Ийэбит, эбэбит, хос эбэбит, республика үс төгүллээх чемпион осеменатора Мария Гаврильевна Филиппова уһун сылларга тыа хаһаайыстыбатыгар таһаарылаахтык үлэлээбитэ, Петр Ионович Яковлев Герой буоларыгар сүдү кылаатын киллэрсибитэ, аны икки сылынан төрөөбүтэ 100 сылын туолар.
Сылын аайы ыытыллар «Наахара хоһууна» күрэх быйыл да саамай кэтэһиилээх-манаһыылаах, ыһыах чаҕылхай түгэнинэн буолла, тоҕус эр бэрдэ сэттэ түһүмэххэ илин-кэлин түһүстэ. Тыа хаһаайыстыбатын салаатыгар өр сылларга түбүгүрбүт, билигин да үлэлиир уонна П.И. Яковлевы кытта бииргэ алтыһан үлэлээбит дьоммут ааттарын үйэтитэн олохтоохтор бириис туруордубут.
Үс бастыҥы кэккэ, уолаттар бары анал ааттарга тиксэн, илии тутуурдаах, өттүк харалаах үөрэн-көтөн тарҕастылар. Ол курдук, биһиги дьоммут үтүө ааттарын, сыралаах үлэлэрин кэнчээри ыччат өйдүү-саныы сырыттын диэн «Наахара хоһууна» күрэххэ Михаил Гаврильевич уонна Мария Гаврильевна ааттарынан бирииһи — 115 тыһыынча уу харчыны Мичил Ефремовка туттардыбыт.
Мичил Русланович Амма-Наахара нэһилиэгин ыччатын лидеринэн үлэлиир, төрөөбүт нэһилиэгэ сайдарын туһугар айар-тутар.
Михаил Гаврильевич уонна Мария Гаврильевна Өнньүөс нэһилиэгин биир биллэр-көстөр дьоһун ыала. Кинилэр нэһилиэктэрин туһугар эрэ буолбакка, дойдуларын сайдыытыгар элбэх үтүө өҥөнү оҥорбут, кылааттарын киллэрбит дьон. Эбэлээх эһэбит 52 сыл бииргэ дьоллоохтук олорбуттара. 2001 сыллахха кыһыл көмүс сыбаайбаларын оҕолорун, сиэннэрин, аймахтарын кытта үөрэ- көтө бэлиэтээбиппит. Билигин кинилэр ааттарын оҕолоро, сиэннэрэ, хос сиэннэрэ үрдүктүк тутан, дьон сиэринэн үлэлээн-хамсаан, Амманан, Дьокуускайынан, Үөһээ Бүлүүнэн, Намынан, Казахстанынан тэнийэн олороллор.
Майя ФЕДОРОВА.