Амма улууһун аактабай саалатыгар улуус баһылыга Степан Кузьмин кыттыылаах экологическай сэбиэт мунньаҕа буолан ааста. Сэбиэт чилиэннэрэ икки суол улахан боппуруоһу көрдүлэр.
Бастакы боппуруоһунан аны сайын Аммаҕа ыытыллыахтаах Бүтүн Арассыыйатааҕы “Вода России” диэн бэстибээлгэ бэлэмнэнии туһунан дьүүллэстилэр. Бу боппуруоһу ВКС нөҥүө СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтин кытта бииргэ көрдүлэр. Иһитиннэриини миниистир солбуйааччыта Лука Сафонов оҥордо. Бэстибээл от ыйын 10 күнүгэр ыытыллара былааннанар. Бу улахан тэрээһиҥҥэ Арассыыйа экологияҕа министиэристибэтиттэн кэлэн кыттыахтара. Салгыы иккис боппуруоһунан тыын суолталаах, каналиационнай -ыраастыыр станцияны тутуу туһунан буолла. Манна иһитиннэриини Амматааҕы судаарыстыбаннай экологическай хонтуруоллуур инспекция салайааччыта Евгений Егоров оҥордо, улуус баһылыга Степан Кузьмин бэйэтин көрүүтү тириэртэ, экологтарга туһаайан салгыы үлэни хайдах ыытыахха сөбүн тириэртэ.
“Ыраастыыр станцияны тутуу олус күүскэ турар. Бириэмэ ирдэбилэ буолла. Бу туһунан буолан ааспыт өрөспүүбүлүкэ ситэриилээх былааһын отчуотугар миниистир Евгений Андреевич Перфильев бэйэтэ этэн турар. Билэргит курдук ааспыт ыйга биһиги Аллараа Бэстээххэ уонна Жатайга баран ыраастыыр станциялар үлэлэрин билсибиппит. Жатайдааҕы станцияны олус сэргээбиппит уонна Аммаҕа маннык бырайыактаах тутуллуон наада диэн түмүккэ кэлбиппит. Бу туһунан улуус баһылыга Степан Николаевич Кузьмин санаатын үллэһиннэ, ыытар үлэбитигэр махтанна. Бу мунньах түмүгүнэн сайын улууспутугар улахан федеральнай таһымнаах тэрээһин ыытылларынан, ону күүскэ туһанан, КОС тутуллара олох наадатын дакаастыыр информация хомуйан сурук бэлэмнииргэ сүбэлэстибит. Сэбиэт чилиэнэ, улуус дьокутаата Эльвира Васильевна Пестерева Амматааҕы киин балыыһа аатыгар кэнники үс сылга улууска инфекционнай, тыҥа ыарыылаарынан ыалдьыы хайдаҕын туһунан депутатскай ыйытык оҥоруохтаах. Түөлбэлэртэн эмиэ санаа хомуйан, быһатын сыыппаралары бэлэмнээн КОС -пут федеральнай үбүлээһини ыларын ситиһиэхтээхпит. Онон иннибитигэр өссө улахан үлэ күүтэр”, — диэн экологическай Сэбиэт чилиэнэ Светлана Окорокова санаатын үллэһиннэ.
“Амма олоҕо” хаһыат