Бөтүҥҥэ «ЧЭЧИР» оскуола лесничествота 2013 сыллаахтан тэриллэн үлэлиир. Семенова Оксана Николаевна биология учуутала, Дьячковская Валентина Ивановна химия учуутала салалталарынан уонна республикаҕа биллэр лесник-инспектор Борисов Егор Афанасьевич куратор, наставник быһыытынан үлэлэһэр. Кэккэ сылларга «Кирпииччэ» алааһыттан 50 м.тэйиччи тыаҕа шелкопряд сиэбит тыатын чөлүгэр түһэриигэ, отун-маһын чинчийиигэ уонна аһаҕас халлааан анныгар нестандартнай уруоктар ыытылаллар.
Лесничество чэрчитинэн «Хотуйа» экопаркаҕа үгүс үлэ ыытыллыбыта. Оҕолор чинчийэр үлэ практикатын араас таһымнаах ааҕыыларга ситиһиилээхтик кытталлара. Ону таһынан биир дойдулаахпыт Биология институтун сүрүн научнай үлэһитэ, тыа хаһаайыстыбатын билимин кандидата Федоров Иннокентий Апполлонович салалтатынан 2022 сылтан «Хааччах» диэн сиргэ лесопитомник тэрийдибит. Лесопитомник үлэтин туһунан Онуфриев Егор 9 кылаас үөрэнээччитэ «Организация питомника древесных растений флоры Якутии в целях последующего использования в лесовосстановлении после масштабных пожаров» араас таһымнаах ааҕыыларга ситиһиилээхтик көмүскээн турар.
Ахсынньы 18 күнүгэр Н.Е.Иванов аатынан Бөтүҥ орто оскуолатын 8-9 кылаас үөрэнээччилэрин холбоһуктаах «ЧЭЧИР» хамаанда үһүс өрөспүүбүлүкэтээҕи оскуолалар лесничестволарын слетугар баран улахан бөлөххө ситиһиилээхтик кыттан кэллилэр. Салайааччы биология учуутала Назарова Ида Иннокентьевна оҕолору АГАТУ-га сырытыннарда. Хамандыыр Онуфриев Егор 9 кылаас үөрэнээччитэ, Назарова Настя, Иванова Нарыйа, Яковлева Сайнаара 8 кылаас үөрэнээччилэрэ.
«Тыа таабырына» квест-оонньуу түмүгэр «ЧЭЧИР» хамаанда улахан бөлөххө үһүс миэстэни ылан 3000-лаах туоһу суругунан уонна өйдөбүнньүк бэлэх тутан үөрүүлэрэ үксээтэ. Слет профориентационнай сыаллаах уонна күөх тыабыт чэлгийэ үүнэригэр, оҕо билиитин хаҥатар тэрээһинтэн оҕолор астынан кэлбиттэр.
Инникитин да бу хайысха күүскэ үлэлээн оҕолор интэриэстэрин тардыа, дойдубут кэрэ айылҕатын харыстыырга иитии-үөрэтии үлэтэ салҕыы сайдыа.
Мария ИВАНОВА.