Эмис нэһилиэгэр Александр Ларионов көҕүлээhининэн «ЧыпчаалFEST» диэн сонун спортивнай бырааhынньык буолан ааста, үгүс дьону сэргэхситтэ. Бу туһунан спорт инструктор Нонна Ноговицына сырдатар.
«Бу фестивальбыт ыҥырыылаах ыалдьыттарбытынан улуустааҕы спорткомитет начальнига, атах оонньуутугар спорт маастара Дмитрий Наумов, Дыгын, Манчаары оонньууларын кыайыылааҕа Борис Сдвижков, тустууктар аан дойдутааҕы кылаастаах спорт маастара, РФ спордун маастара, кумахха тустууга аан дойду чемпиона Герман Устинов, аан дойдутааҕы кылаастаах спорт маастара, РФ спордун маастара Европа, Арассыыйа чемпионаттарын призердара Ньургун Скрябин, РФ спордун маастара, Белоруссия республикатын аан дойду таһымнаах спордун маастара Андрей Бекренев, оҕунан ытыыга спорт маастара, аан дойду, Арассыыйа күрэхтэрин кыайыылааҕа олимпиада кыттыылааҕа Кристина Устинова, кроссфитка Арассыыйа күрэҕин призера, ГТО оонньууларын кыайыылааҕа Дьулус Бубякин, 1999 сыллаахха Манчаары оонньууларын оҕолорго мас тардыһыытыгар муҥутуур кыайыылааҕа, Тоҕус Томтор оонньууларын кыайыылааҕа, бэтэрээннэргэ аан дойду 2 -с призера Мерсияз Пахомов, өрөспүүбүлүкэ панкратиоҥҥа федерациятын президенэ Петр Уваров, Саха өрөспүүбүлүкэтин хапсаҕайга спорт маастара Егор Сутаков буоллулар. Кэлбит ыалдьыттар бэйэлэрин көрүҥнэринэн маастар-кылаастары ыыттылар.
Хас биирдии спортсмен биэрбит маастарыстыбаларын эдэр спортсменнарбыт инники олохторугар туһаныахтара диэн эрэнэбит. Онтон олохтоох нэhилиэнньэҕэ эдэриттэн эмэнигэр диэри саастарынан «Хомуур» күрэх ыытылынна. Күрэх кыайыылаахтара ыалдьыттартан бириистэри туттулар. Эбиэт кэмигэр спорт бэтэрээннэрин кытта истиҥ кэпсэтии, санаа атастаhыыта буолла. Эбиэт кэннэ оҕолорго тутум эргииригэр күрэх ыытылынна. Манна бастакы миэстэни Баир Ларионов, иккиһи Степа Степанов, үһүс миэстэни Игнатий Устинов ыллылар. Ол кэннэ олохтоохтор уонна ыалдьыттар волейболга ыhыылаах-хаhыылаах табаарыстыы көрсүhүүлэригэр 2:0 ыалдьыттар тустарыгар буолла.
Киэhэтин уоттаах-күөстээх кэнсиэр буолла. Эмистэр бэйэбит ыччаттарбыт Василий Бубякин — Адельфос, Егор Петров — Басан, Василий Татаринов — Хоту Уолан, ыалдьыттарбыт Кэскилээнэ, Кэрэчээнэ Туприналар ылбаҕай ырыаларынан киэргэттилэр. Күммүт эмиэ үөрбүт курдук чаҕылыччы тыган биһигини кытта тэҥҥэ үөрэр курдук буолла. Кэлбит ыалдьыттарбыт даҕаны, олохтоохтор даҕаны бу тэриллибит спорт бырааһынньыгыттан бары астынан тарҕастыбыт», — диэн Нонна Николаевна сырдатта.
Дьэ бу курдук Сахабыт сирин спордун сулустара кыттыылаах «ЧыпчаалFEST» тэриллэн нэһилиэк дьоно, ордук чуолаан эдэр спортсменнар харахтара чаҕылыйда, холобур буолар дьоннорун көрөн өссө үрдүккэ дьулуһууга стимул ыллылар.
«Амма олоҕо» хаһыат