Эмис нэһилиэгин “Чуораанчык” уһуйаана бэрт интэриэһинэй, оҕону айылҕаҕа, төрөөбүт дойдутугар тапталы иҥэрэр, күүһүрдэр сыаллаах “Сыарҕалаах атынан айан” диэн бырайыагы 2019 сылтан саҕалаан үлэлэтэр. Бырайыак чэрчитинэн “Үүтээн олоҥхото” тэрээһин иитиллээччилэри уонна төрөппүттэри түмэн ыытылынна.
Арассыыйаҕа Дьиэ кэргэн, Саха сиригэр Оҕо саас, улууска уонна Эмис нэhилиэгэр Олоҥхо сылларынан «Үүтээн олоҥхото» тэрээhин олус сэргэхтик ааста. Уһуйаан сылгыны өрө туппут Владимир Петрович уонна Наталья Николаевна Константиновтар дьиэ кэргэттэрин кытта ыкса үлэлэһэр. Дьэ ол быһыытынан кинилэр сылгыларын базаларыгар уолаттар аҕаларын, эhэлэрин кытта сыарҕа олорсон айаннаан тиийдилэр.
“Оҕолору хаhаайка Наталья Николаевна арчылаан, быырпаҕынан, алаадьынан толору астаах аhынан күндүлээтэ. Онтон уолаттар сылгы туһунан хоһоон доргуччу аахтылар, өссө биир дойдулаахпыт Юрий Борисов олоҥхотуттан быһа тардан толордулар. Хаhаайын Владимир Петровичтан аҕаларга, оҕолорго бэйэтин баҕа санаатын, алгыһын тириэртэ. Ол кэнниттэн сыл аайы ыытыллар Аҕа уолунаан күрэхпитин тэрийдибит. Уолаттарга ох саанан ытыыга күрэх ыытылынна Онно 10 уолтан саамай бастыҥ ытааччынан Костя Стручков тахсан кыайыы өрөгөйүн биллэ. Онтон уол аҕатын кытта күрэҕэр бастакы миэстэни Айастаан уонна Мичил Новиковтар, иккис миэстэни Дуолан уонна Игорь Болтуновтар, үһүс миэстэни Миша уонна Валерий Неустроевтар ыллылар. Манна даҕатан эттэххэ олоҥхоһут уолаттарбытыгар олохтоох култуурабыт киинэ үбүлээн Олоҥхо тыйаатырыгар таҥас тиктэрдибит. Онон кулууптарбытыгар барҕа махтал. Ону сэргэ биһигини куруутун өйүүр, тэрээһиммитин ыытыыга күүс-көмө буолар Наталья Николаевнаҕа, Владимир Петровичка дириҥ махталбытын тириэрдэбит”, — диэн уһуйаан спорт инструктора Нонна Ноговицына сырдатта.
“Амма олоҕо” хаһыат