Быйыл кэмигэр ардаан, курааннаан туораахтаах култуура хото үүннэ. Маҥхааһайдар толору бурдугунан туоллулар. Балаҕан ыйын 15 күнүн туругунан улуус бурдукка былаанын аһары толордо. Билигин сүрүн сорук ылбыт үүнүүнү харайыыга туһаайыллар.
Хаһан да буоларын курдук хомуллубут бурдугу кууллааһыҥҥа уонна ону дьаарыстааһыҥҥа улуус тэрилтэлэрэ субуотунньукка тахсаллар. Бу үтүө үгэс кэһиллибэккэ уонунан сылларынан тиийэн кэллэ. Төһө да 21-с үйэҕэ олордорбут дьон-сэргэ көмөтө суох маҥхааһайдарга кутуллубут бурдук хомуллубат. Онон хаһаайыстыбалар нэһилиэнньэ көмөтүгэр олус диэн наадыйаллар.
“Бурдукпут үүнүүтэ быйыл хайа да сыллааҕар ордук буолла. Ол курдук оруобуна брудук тахсыытыгар ардахтар түһэннэр, туораахтаах бурдукпут олох өрө анньан кэбистэ. Онон былаан туолла, аһары барда. Аны билигин бу хомуллан кэлбит бурдугу кууллааһыҥҥа, дьаарыстааһыҥҥа күүстээх субуотунньуктар салҕанан барыахтарын наада. Төһө кыалларынан хаһаайыстыбаларбытыгар күүс-көмө буолуоҕуҥ диэн ыҥырабын. Бөтүҥҥэ, Абаҕаҕа, Покровкаҕа манна анаан күрэхтэһиилэри олохтоотулар. Эбиэтинэн хааччыйаллар. Онон кытаатан тэрилтэлэр, сорохтор иккистээн да буоллар, субуотунньукка тахсалларыгар көрдөһүөхпүт этэ. Бары биир күүс буолуоҕуҥ”, — диэн улуус тыатын хаһаайыстыбатын управлениетын салайааччыта Ион Кононов санаатын тириэрдэр.
Балаҕан ыйын 15 күнүн туругунан улуус икки хаһаайыстыбатыгар, саамай элбэх ыһыылаах “Амма” Ауо уонна “Абаҕа” ХЭТ маҥхааһайдарыгар уопсайа 16908 бурдук куулланна, 14561 куул дьаарыстанна. Хайа тэрилтэлэр төһөлүү куулу оҥорбуттарын уонна дьаарыстаабыттарын көрүөҕүҥ. Ол курдук бэтэринээрнэй сулууспа 550 кууллаатылар, 100 куулу дьаарыстаатылар, киин балыыһа 470 кууллаатылар, “Хатыҥчаана” уһуйаан 3490 кууллаатылар, 120 куулу дьаарыстаатылар, нэһилиэнньэҕэ социальнай көмнү оҥорор биир кэлим киин 950 кууллаатылар, үп управлениета 350 кууллаатылар, улуус дьаһалтата 1263 кууллаатылар, “Радуга” уһуйаан 2082 кууллаатылар уонна дьаарыстаатылар, Амма нэһилиэгин дьаһалтата 781 кууллаатылар уонна дьаарыстаатылар, Амматааҕы Ф. Потапов аатынан норуот айымньытын дьиэтэ 729 кууллаатылар уонна дьаарыстаатылар, “Лесавиа” 1350 кууллаата, 3500 дьаарыстаата, ойуур хаһаайыстыбата 650 кууллаатылар. “Амма” Ауо кылаабынай агронома Назар Черкашин бэлиэтииринэн, ким бурдук атыылаһыан баҕарар хонтуораҕа кэлэн билсиэн сөп. Ону сэргэ баҕалаахтар бэйэлэрэ кэлэн 70 куулу куттахтарына 1 куулу бэйэлэригэр ылыахтарын сөп. Маннык балаһыанньа улуус бурдугу үүннэрэр хаһаайыстыбаларыгар баар. Онон биирдиилээн кэпсэтэн, билсэн тахсыахтарын сөп диэн тыа хаһаайыстыбатын управлениетыгар быһаардылар. Хаһаайыстыбалар төлөпүөннэрэ: «Амма» Ауо — 89644238703, «Абаҕа» ХЭТ — 89241765685, «Бөтүҥ» ТХПК — 89248660007, «Соморсун» ТХПК -89248750189.
“Амма олоҕо” хаһыат