Сайыҥҥы от-мас үлэтэ бүтэн, кыстыкка киириэх иннинэ Соморсун нэһилиэгэр сыллата күһүҥҥү ыраастаныыга, көҕөрдүүгэ, сайыҥҥы водопроводы хомуйууга субуотунньуктар ыытыллаллар. Манна нэһилиэк олохтоохторо кырдьаҕастыын эдэрдиин куруук көхтөөхтүк кытталлар.
Быйылгы сылга балаҕан ыйын 17 күнүгэр нэһилиэк сыбаалкатын уонна кылабыыһаны ыраастыырга элбэх киһи таҕыста. Нэһилиэкпит ис култууратын, туругун көрдөрөр сирдэбитигэр олохтоохтор ис сүрэхтэриттэн ыалдьан, кэнчээри ыччаппытыгар ыраас эйгэни хаалларарга сүрүн соруктаах күүскэ үлэлииллэр. Күһүн, саас сыбаалканы тахсан өрө тардан ыраастыыллар.
Быйылгы сылга олохтоох көҕүлээһиннэри өйүүр бырагырааманан үп министиэристибэтэ ыытар күрэҕэр «Нэһилиэк сыбаалкатын суолун оҥоруу” бырайыакпыт кыайан, ол түмүгэр сыбаалканы эргийэ суол оҥоһуллан бөх тиэйэргэ сөптөөх усулуобуйа тэрилиннэ.
Балаҕан ыйын 19 күнүгэр Албан аат болуоссатыгар баар «Кыайыы саадын” ыраастаан, мастарга уу кутан, элбэх сыллаах сибэккилэри, талахтары көһөрөн олордон субуотунньуктаатыбыт.
Балаҕан ыйын 22-23 күннэригэр сайыҥҥы водопроводы хомуйууга сыллата нэһилиэк тэрилтэлэрин эр дьоно территориянан арахсаннар аныгыс сылга водопровод харгыһа суох үлэлииригэр улахан көмөлөрүн оҥордулар.
Балаҕан ыйын 24-25 күннэригэр “Аныгы куорат эйгэтин тэрийии” федеральнай бырагыраама күрэҕэр киирсэммит “Элэһин эркээйитэ мини-парк” бырайыага 2027 сылга үбүлээһиҥҥэ киирэн, тутуута барар сиригэр икки күннээх субуотунньукка үлэ күөстүү оргуйда.
Парка тутуллуохтаах элбэх кыбартыыралаах эргэ уопсай дьиэ территориятыгар хаалбыт урукку тутуулары көтүрэн, сыбаайалары ыраастаан үлэ күөстүү оргуйда. Элбэх үлэни эрэйэр субуотунньукка нэһилиэк олохтоохторо икки күн устата көхтөөхтүк кыттаннар былааннаммыт үлэ кэмигэр бүтэригэр эрэллээхпит.
Нэһилиэкпит олохтоохторо маннык субуотунньуктарга күргүөмнээхик кытталларыттан киэн туттабыт, махтанабыт. Барыбыт кыһамньытынан инники сайдыыга аартыкпыт арыллан иһиэ диэн бигэ эрэллээхпит.
Надежда БЕЛОЛЮБСКАЯ,
«Соморсун нэһилиэгэ» тыа сирин түөлбэтин баһылыгын солбуйааччыта.