Соморсун нэҺилиэгэр Саха норуодунай суруйааччыта Василий Егорович Васильев — Харысхал түмэлин акылаата түҺэр үөрүүлээх тэрээҺинэ буолан ааста. Акылаат суруйааччы аатын сүгэр норуот айымньытын киинин тэлгэҺэтигэр, үөрэммит оскуолата турбут сирин оннугар түстэ.
Норуот суруйааччыта, драматург, прозаик, общественнай диэйэтэл Василий Егорович Васильев — Харысхал олоҕун, айар үлэтин, дьонугар-сэргэтигэр хаалларбыт нэҺилиэстибэтин билиҺиннэрэр түмэл дьиэтин акылаата түспүтүн бэлиэтиир күҥҥэ биир дойдулаахтара мустан инники үлэни торумнаатылар, санааларын атастастылар. Бэлиэ күн сахалыы алгыҺынан арылынна, акылаат бөҕө-таҕа буоларыгар, тутуу салгыы ыытыллан этэҥҥэ түмүктэнэригэр баҕа санаа этилиннэ. Дьоро күҥҥэ бу санааны сахпыт, этии киллэрбит Саха норуодунай суруйааччыта, бииргэ үөскээбит, үөрэммит доҕоро Дмитрий Федосеевич Наумов — Миитэрэй Наумов, Василий Егорович кыыҺа Ньургуйаана Шишигина, Амма улууҺун баҺылыгын э.т. Виктор Смирников, Саха судаарыстыбаннай тыйаатырын тэрийэр салаатын салайааччыта Ньургуйаана Илларионова, улуус култуураҕа уонна норуот айымньытыгар управлениетын салайааччыта Николай Нестерев, бэйиэт Семен Капитонов уонна суруйааччы чугас дьоно, олохтоохторо кыттыыны ыллылар.
«Бүгүҥҥү күҥҥэ Василий Егорович олоҕун, литературнай нэҺилиэстибэтин, баай архыыбын матырыйаалларын бар дьоҥҥо көрдөрөр, билсиҺиннэрэр үчүгэй дьиэтэ-уота суох. Бэйэтэ олорбут, улааппыт дьиэтэ туруга олох хаарбах. Онон бу дьиэ куопуйатын саҥардан тутар ордук диэн кини төрөөбүтэ 75 сыллаах үбүлүөйүгэр быҺаарыы ылбыппыт. Бу этиини улуус дьаҺалтата өйөөн бюджеттэн 2 мөл. солк көрөн акылаат түстэ. МаҺа 23 дм лафет, урукку тутууну санатар. Акылаат маҺа Соморсун сириттэн кэрдиллибитэ. Онтон атын матырыйаала атыылаҺыллынна. Хара муостатын хаптаҺынын, полистиролун биир дойдулаахпыт, Василий Егорович сиэн быраата Станислав Семенович Терентьев спонсордаата. Аны салгыы тутарга, ситэрэргэ бары үп-харчы булуутугар үлэлэҺэбит. Үп-харчы уустугунан, спонсордары көрдүүбүт. Саха литературатыгар, драматургияҕа сүдү кылааттаах киҺибитин үйэтитиигэ ыытыллар тутууну өйүөхтэрэ диэн эрэнэбит. Манна бары улуус дьоно, өрөспүүбүлүкэ да дьоно туора туруохтара суоҕа дии саныыбын. Маныаха анал счет «Сомоҕо» диэн НКО быҺыытынан аҺылынна. Быйыл көҥдөйө бүтүөхтээх. Тутууну олохтоох, тутууга уопуттаах уолаттарбыт тута сылдьаллар»,- диэн Соморсун нэҺилиэгин баҺылыга Алексей Кононов билиҺиннэрэр.
Норуот суруйааччыта Миитэрэй Наумов эҕэрдэ тылыгар, акылаат түспүтэ ураты суолталааҕын, БаҺылай Харысхал аатын үйэтитиигэ, кини олорон ааспыт олоҕун, нэҺилиэстибэтин бар дьоҥҥо, кэнчээри ыччакка билиҺиннэрэ туруо диэн этэр. Түмэл оруобуна суруйааччы 1970-1980 сылларга олорбут дьиэтин куопуйата буолуохтаах. Дьиэ салҕааҺыннаах эбит. Кээмэйэ 12×6 миэтэрэ.
«Бу түмэл тутуллуута биҺиги көлүөнэ дьон ситиҺиитэ буолар. Тоҕо диэтэр, манна биҺиги оскуолабыт турбута. Аттыгар турар харыйа сүөҺү алдьаппыт маҺа этэ. Кини таҺыгар Василий Анемподистович Нестерев олордубут тиит маҺа турар. Харыйа биҺиги оройун тутарбыт курдук кыра этэ. Билигин кини төҺө үрдүгүй да, оччо кэм ааста. БаҺылай Харысхал ол кэм бэлэхтээбит, бу нэьилиэк дьоно, бу оскуола ииппит улуу киҺитэ буолар. Кини олорбут олоҕо, үлэлээбит үлэтэ үрдүктүк сыаналаммытыттан бииргэ улааппыт, үөскээбит киҺитэ киэн туттабын. Түмэл ситэн-хотон, олохтоох уолаттар кичэллээхтик тутан -хабан таҺаарыахтара, түмүктүөхтэрэ диэн эрэнэбин»,- диэн Дмитрий Федосеевич этэр.
Дьоро күҥҥэ кэлбит ыалдьыттар сахалыы сиэринэн тутуу үйэлээх, бөҕө буоллун диэн баҕа санааларын этэн акылаат муннуктарыгар алаадьы уурдулар. Акылаат түстэ, ол аата улахан үлэ саҕаланна. Аны кэлэр сылга аанын аҺан үйэлээх үлэни кэрэҺэлиэ турдаҕа.
Түмэл хайдах-туох буолуоҕун туҺунан сиҺилии хаҺыакка сырдатыахпыт. Сурутуҥ, ааҕын.
«Амма олоҕо» хаҺыат