А.П.Рязанскай аатынан Соморсун орто оскуолатыгар тыа хаһаайыстыбатын бастыҥ үлэһиттэрин кытта сэргэх көрсүһүү буолан ааста, оҕолор минньигэс мүөт да амсайдылар.
Быйыл улууспутугар биллэриллибит Тыа хаһаайыстыбатын сылынан уонна үүнэр көлүөнэ идэтин таба таларыгар көмөлөөх тыа сирин бастын үлэһит дьонун кытта үөрэнээччилэргэ туһалаах, истиҥ көрсүһүү тэрилиннэ. Көрсүһүүгэ кыттыыны “Соморсун” ТХПК бэрэссэдээтэлэ Ксенофонт Федоров, бухгалтер Галина Заборовская, сүөһү иитиитинэн утумнаахтык дьарыктанар Ксения Давыдова, сылгыны көрөр-истэр Максим Григорьев, улахан хаһаайыстыба хаһаайката Сардана Борохина, сүөһү иитиитин таһынан тигээйинэн дьарыктанар Василий Данилов ыллылар.
Ыалдьыттар оҕолорго бэйэ дьыалатын тэриниигэ олус туһалаах сүбэлэри биэрдилэр, тыа хаһаайыстыбатын эйгэтин кистэлэҥнэрин, сыралаах үлэтин, үтүө өрүттэрин сэһэргээтилэр. Ханнык да түгэҥҥэ үөрэхтээх, киэҥ билиилээх киһи элбэҕи ситиһэрин, үлэтигэр туһалаах буоларын, оскуолаҕа үөрэнэр эрдэхтэн үөрэххитигэр кыһаллыҥ, хас биирдии предмет олоххо, үлэҕэ-хамнаска олус туһалаах буоларын бэлиэтээн эттилэр.
Түмүккэ Василий Данилов Соморсуммут күөх хонуутугар төлөһүйбүт ыҥырыа мүөтүнэн оҕолору, ыалдьыттары күндүлээтэ.
Надежда ОХЛОПКОВА, Соморсун орто оскуолатын иитэр үлэгэ дириэктэр сүбэһитэ