Амма улууһун биир бөдөҥ бааһынай хаһаайыстыбатын салайааччыта Игорь Петров күннэтэ Болугур нэһилиэгэр баар собуокка үүтүн туттарар. Үүт туттарааччы собуот үлэтинэн астынарын уонна манна үлэлиир дьон бэйэлэрин үлэлэрин үтүө суобастаахтык толороллорун туһунан этэр.
“Болугур собуота күннэтэ 5 туонна курдук үүтү астаан таһаарар. Манна Покровкаттан, Болугуртан уонна Амма Наахараттан үүт кэлэн астанар. Өссө ардыгар Чапчылҕан собуотугар алдьаныы таҕыстаҕына, тутуллубут үүтү манна аҕалаллар. Онон этэргэ диэри собуот улуус биир экэниэмиичэскэй киинэ буолар дии саныыбын. Тоҕо диэтэр манна үс нэһилиэк дьоно үүтүн туттаран харчы аахсар, дьон үлэлээн хамнастанар. Быйыл биһиги улууспутугар Тыа хаһаайыстыбатын сыла биллэриллэн турар. Онон бу эйгэ бары салаатыгар үлэлии сылдьар дьон туһунан киэҥник сырдыан наада диэн санаалаахпын. Холобура мин бааһынай хаһаайыстыбам үүтүн “Амма” СППК Болугурдааҕы филиалыгар туттарбыта хаһыс да сыла буолла уонна бу кэлэктиип үлэтинэн толору астынарбын этиэхпин баҕарабын. Чахчы быйыл биһиги сылбытыгар айылҕабыт биһиэхэ тургутууну оҥорор диэххэ наада. Сайын улаханнык курааннаабыта, онон үүт да түһэ сылдьыбыта. Ол гынан баран тыа хаһаайыстыбатын үлэһиттэрэ онтон иҥнибэккэ, туох баар сыраларын ууран туран, оттоон-мастаан, үүт ыан кэллибит. Ол иһигэр бу үүтү астааһыҥҥа үлэлиир дьоммут эмиэ күн өрөөбөккө үлэлии-хамсыы, үүт аһы оҥорон нэһилиэнньэҕэ таһаара тураллар.
Болугур үүтүн собуотун маастара Александра Андреевна Назарова кэлэктиибин, лаборант Иванова Туйара Георгиевна, оробуочай Кузьмина Луиза Ивановна буолан үлэлэрин сатабыллаахтык толорон, собуот биир күн тохтообокко үлэлиирин хааччыйан кэллилэр.
Үүт таһар массыына суоппара Назаров Гаврил Степанович, солбуйар суоппара Боярскай Евгений Александрович куруутун хойутаабакка кэлэн үүтү ылаллар, обрат да аҕалаллар. Онон үүт туттарааччылар махталбыт улахан”, — диэн Игорь Петрович санаатын тириэрдэр.
“Амма олоҕо” хаһыат
Хаартыска: Игорь Петров