Соморсун нэһилиэгэр үлэ субуотунньуктара көхтөөхтүк тэриллиннилэр. Эр дьон күүһүнэн спортсаала өрөмүөнүн маһа бэлэмнэннэ, пааматынньыктар хаардара ыраастанна.
Соморсун нэһилиэгин эр дьонун түмсүүтэ спорт саалатын өрөмүөнүгэр мас бэлэмнээһинигэр көхтөөхтүк таҕыста. Ол курдук барыта 30 эр дьон, 8 МТЗ — 82 трактордаах механизатордар кыттаннар былааннаммыт үлэ икки күнүнэн түмүктэннэ, барыта 180 мас суулларыллан бэлэмнэннэ. Нэhилиэк баһылыга Алексей Кононов быйылгы сылга өрөмүөн үлэтин бүтэрэн, сааланы үлэҕэ киллэрэр сыаллаах субуотунньугу тэрийэн ыытта.
Маны сэргэ Аан дойдуга пааматынньык харыстабылын күнүн аахсыйатыгар А. П. Рязанскай аатынан оскуола уолаттара, сыллата кыттан «Албан аат» болуоссатыгар уонна «Сэhэн» искибиэргэ баар пааматынньыктар хаардарын ыраастаатылар. Онтон нэһилиэк тэрилтэлэрэ Өрөспүүбүлүкэ күнүн көрсө, Дойду үрдүнэн ыытыллар, «Уопсастыбаннай территориялары ыраастыыр субуотунньукка» аахсыйаҕа кыттыhан бэйэлэрин территорияларын ыраастаатылар, хомуйдулар.
Күүстээх үлэҕэ кыттыбыт бар дьоммутугар истиҥник махтанабыт, инникитин туруоруммут соруктары толорон, сайдыы аартыгын арыйан иhиэҕин диэн ыҥырабыт. Соморсун нэhилиэгэ быйылгы сылга «Аныгылыы куорат эйгэтин үөскэтии» диэн федеральнай бырагыраамаҕа киирэн, бастакы түһүмэҕи ааhан куоластааhыҥҥа киирдэ. Онон күндү биир дойдулаахтарбытын, Аммабыт улууhун олохтоохторун, «Мини-парк Элэhин Эркээйитэ» бырайыакка куоластыыргытыгар ыҥырабыт. Салгыы бу аахсыйаҕа кыттыhан, нэhилиэк олохтоохторо Үлэ уонна Саас бырааhынньыгын үлэнэн уруйдаан, өссө күргүөмнээх субуотунньукка тахсыахтара.
Надежда БЕЛОЛЮБСКАЯ